Utanríkisráðuneytið segir, að haldi rússneska þingið fast við að staðfesta ekki viðauka við Mannréttindasáttmála Evrópu muni það hafa alvarlegar afleiðingar fyrir starfsemi Mannréttindadómsstóls Evrópu og sjálfstæði hans gagnvart stjórnvöldum í aðildarríkjum Evrópuráðsins.

Fjallað er um málið í Stiklum, vefriti viðskiptarskifstofu íslenska utanríkisráðuneytisins og kemur þar fram að Stefán Lárus Stefánsson, sendiherra og fastafulltrui Íslands hjá Evrópuráðinu, hafi tekið undir gagnrýni aðildarríkja á hendur Rússum.

Í Stiklum segir, að Mannréttindadómstóllinn í Strassborg sé ein meginstofnun Evrópuráðsins og hafi fjölgun aðildarríkjanna leitt af sér gífurlega fjölgun mála sem vísað er til dómstólsins frá aðildarríkjunum 46.

Fyrir um sex árum síðan var samþykkt að setja af stað umbótaferli til að unnt væri að takast á við þessa miklu fjölgun kærumála. Sett var á laggirnar sérfræðinganefnd sem skilað hefur skýrslu með tillögum um nauðsynlegar úrbætur. Forsenda þessara tillagna var fullgilding allra ríkja Evrópuráðsins á viðauka 14 við Mannréttindasáttmála Evrópu en helstu áhrifin hefðu verið að að innleiða ný vinnubrögð hjá dómstólnum til að fækka kærumálum sem vísað er til dómstólsins verulega. Þess verður ekki langt að bíða að fjöldi kærumála sem bíða afgreiðslu Mannréttindadómstólsins fari upp fyrir 90.000 kærumál.

Haustið 2006 höfðu öll aðildarríki ráðsins fullgilt viðauka 14, að Rússlandi undanskyldu. Frameftir síðasta ári héldu Rússar því fram, að töf á fullgildingu væri n.k. skriffinnskuspurning í Moskvu. Í Stiklum segir, að það hafi því komið verulega á óvart þegar spurðist frá Moskvu, að rússneska Dúman hefði þann 20. desember s.l. fellt með atkvæðagreiðslu, 138 gegn 27, að fullgilda viðauka 14 fyrir Rússlands hönd.

Í Stiklum segir, að þessi ákvörðun rússnesku Dúmunnar hafi sett allt endurbótaferli Mannréttindadómstólsins í algert uppnám, engar breytingar verði innleiddar á starfsemi dómstólsins til að gera hann skilvirkari, kærumálin hrúgist upp og kosning nýrra dómara í 22 aðildarríkjum seinna á árinu sé miklum vafa undirorpið.

„Það er skemst frá því að segja að þessi afstaða Dúmunnar hefur kallað fram mikla og harða gagnrýni á Rússland. Fyrsti fundur ráðherranefndar Evrópuráðsins á nýbyrjuðu ári var haldin miðvikudaginn 17. janúar sem hefði átt að snúast um endurbótaskýrsluna en snérist þess í stað um afstöðu Rússlands gagnvart viðauka 14 og þá blindgötu sem endurbótaferlið er nú komið í. Fulltrúi Rússa svaraði því til að þingmönnum hefði m.a. fundist dómar dómstólins, oftar en ekki Rússlandi í óhag, vera litaða af neikvæðri pólitískri afstöðu dómarana gagnvart Rússlandi," segir í Stiklum.