Einar K. Guðfinnsson sjávarútvegsráðherra telur að herferð Breta til að fjölga andstæðingum hvalveiða í Alþjóða hvalveiðiráðinu muni veikja stöðu ráðsins sem hafi ekki verið burðug fyrir. „Mér sýnist sem þarna sé verið að fjölga nöglunum í líkkistu Alþjóða hvalveiðiráðsins,“ sagði hann. Þetta muni endanlega gera það að verkum að ráðið verði utangarðsstofnun sem fáir taki mark á en hvalveiðiþjóðir muni stunda hvalveiðar innan annarra vébanda, sem væri fullkomlega löglegt.

Aðspurður hvers vegna þær þjóðir sem hugsanlega gengju í ráðið vegna herferðarinnar ættu ekki að hafa jafnmikið að segja um hvalveiðar og Íslendingar, sagði Einar að hinn yfirlýsti tilgangur væri að koma í veg fyrir hvalveiðar en grundvallarsamþykkt ráðsins gengi út á að því væri ætlað það hlutverk að stjórna hvalveiðum. Spurður hvort það væri ekki ákveðin stjórnun fólgin í því að banna veiðar, sagði Einar að það væri enginn vafi á því að veiðibann væri ekki í samræmi við anda samþykkta hvalveiðiráðsins.

Einar sagði óvíst hvort eða hvernig stjórnvöld brygðust við herferð Breta en það kæmi vissulega til greina að hafa samband við fulltrúa sömu ríkja og Bretar til að útskýra hlið Íslands á málinu. Hann bætti við að verulega myndi reyna á hvalveiðibannið í vor þegar Bandaríkjamenn færu fram á kvóta til hvalveiða fyrir íbúa í Alaska.