Eiður Smári Guðjohnsen, fyrirliði íslenska landsliðsins og leikmaður Evrópu- og Spánarmeistara Barcelona, og Eimskipafélag Íslands undrrituðu í gær samstarfssamning til þriggja ára á sviði markaðs- og kynningarmála. Samkvæmt samningnum er Eimskipi heimilt að nota nafn og ímynd Eiðs Smára til kynningar á fyrirtækinu.

Slagorð Eimskips "Íslensk sókn um allan heim" tengist með afgerandi hætti Eiði Smára, bæði sem Englandsmeistara og leikmanni Barcelona á Spáni. Eiður Smári er í fremstu röð knattspyrnumanna í heiminum í dag og Eimskip er leiðandi fyrirtæki á sviði hitastýrðra flutninga í N-Evrópu.

Magnús Þorsteinsson, stjórnarformaður Eimskips, undirritaði samninginn ásamt Eiði Smára að loknum leik Barcelona og Celta Vigo í gærkvöldi.

Magnús sagði að það væri mikill ávinningur fyrir Eimskip að fara í samstarf við Eið Smára. "Eiður Smári er í sérflokki þegar kemur að Íslendingum sem skarað hafa fram úr á heimsvísu. Hans nafn og góða ímynd mun nýtast á margvíslegan hátt í starfi Eimskips."

Magnús sagði að hluti af samstarfi Eiðs Smára og Eimskips yrði á sviði góðgerðamála og beindist að íslenskum börnum. Eimskip myndi byrja á því að heita hálfri milljón króna á Neistann, styrktarfélag hjartveikra barna, fyrir hvert mark sem Eiður Smári skorar í deildarkeppninni. Sömuleiðis myndi Eimskip heita einni milljón á Umhyggju, félag til styrktar langveikum börnum, fyrir hvert mark sem hann skorar í meistaradeild Evrópu.

Eiður Smári sagðist hlakka til samstarfs við Eimskip "Með þessum samstarfssamningi mun skapast tækifæri til ferskari tengingar við Ísland á nýjum vettvangi."