Dagskrá Listahátíðar í Reykjavík 2007 var kynnt á blaðamannafundi í morgun og eru þar margir „óvenjulega stórir og glæsilegir viðburðir“ á dagskrá, að sögn kynningarstjóra hátíðarinnar, Guðrúnar Kristjánsdóttur. 28 viðburðir eru á dagskrá og má þar m.a. nefna San Fransisco ballettinn, franska götuleikhúsið Royal Deluxe og stórtónleika tónskáldsins Goran Bregovic og 40 manna hljómsveitar hans frá Balkanskaga. Bregovic samdi m.a. tónlist við kvikmyndirnar Underground og Arizona Dream.

Hátíðin verður haldin dagana 10. – 26. maí. Upphafsdagar hátíðarinnar marka lok frönsku menningarkynningarinnar „Pourqoui Pas? Franskt vor á Íslandi 2007” með glæsilegum götuatriðum franska hópsins Royal de Luxe, sem sýna útiatriði af stærðargráðu sem Reykvíkingar hafa ekki áður kynnst, að því er segir í fréttatilkynningu vegna hátíðarinnar. Brúður götuleikhússins verða um 8 metra háar. Reykvískum skólabörnum verður boðið í bæinn af þessu tilefni og munu þau fylla götur miðborgarinnar í miðborginni ásamt hinum frönsku gestum.

Þorgerður Katrín Gunnarsdóttir menntamálaráðherra setur hátíðina í Listasafni Íslands og við það tilefni koma fram Hamrahlíðarkórinn, afríski hópurinn Konono N°1, Ghostigital og fleiri. Af öðrum stórviðburðum nefnir Guðrún tónleika barítónsöngvaranna Bryn Terfel og Dmitri Hvorostovsky, auk frumflutnings Sinfóníuhljómsveitar Íslands og einsöngvara hér á óperu Hafliða Hallgrímssonar „Die Wält der Zwischenfälle“.

Eins og fyrr segir verða 40 tónlistarmenn frá Balkanskaga, undir forystu hins heimsþekkta tónlistarmanns og tónskálds Goran Bregovic, með fjör fyrir brúðkaup og jarðarfarir í Laugardalshöllinni í samstarfi við tónlistarhátíðina Vorblót. Sviðslistum verður gert hátt undir höfði á hátíðinni og leikið á götum úti, í varðskipi, heimahúsum og víðar. Barnaleiksýningin Les Kunz fer norður í Samkomuhúsið á Akureyri og í íþróttahúsið á Egilsstöðum og einn þekktasti enskumælandi leikflokkur heims, Cheek by Jowl, kemur hingað í samstarfi við Þjóðleikhúsið með sýninguna á Cymbeline eftir Shakespeare.

Leiksýningin Partíland verður sýnd í Þjóðleikhúsinu, sýningin Yfirvofandi verður í heimahúsi í Reykjavík og Gyðjan í vélinni verður flutt um borð í varðskipinu Óðni. Sinfóníuhljómsveitin leikur með hinum heimsþekkta píanóleikara Hélène Grimaud, en þeir tónleikar marka lok frönsku menningarkynningarinnar. Af öðrum tónlistarviðburðum má nefna flutning kvartetts Kammersveitar Reykjavíkur á strengjakvartettum Jóns Leifs, tónleikadagskrá Áshildar Haraldsdóttur helgaða verkum Atla Heimis Sveinssonar í Þjóðleikhúsinu og tónleika Hljóðkompanísins og íslenskra og erlendra tónlistarmanna í Hallgrímskirkju. Nánar má kynna sér dagskrána og listamennina með því að smella á tengilinn með fréttinni.

Vefur Listahátíðar í Reykjavík 2007