Ker,fyrrum eigandi Esso, var í Héraðsdómi Reykjavíkur í dag dæmt til að greiða Sigurði Hreinssyni fimmtán þúsund krónur í skaðabætur vegna tjóns sem Sigurður telur sig hafa orðið fyrir vegna ólöglegs samráðs stóru olíufélaganna þriggja. Ker var jafnframt dæmt til að greiða Sigurði fimm hundruð þúsund krónur í málskostnað.

Kristinn Hallgrímsson, lögmaður Kers, sagðist í samtali við Fréttavef Morgunblaðsins vera ósáttur við dóminn og að honum yrði áfrýjað til Hæstaréttar.

Með dómi sínum frá því í janúar lagði Hæstiréttur fyrir Héraðsdóm Reykjavíkur að fjalla efnislega um tiltekna dómkröfu í máli Sigurðar Hreinssonar gegn Keri hf., fyrrum eiganda Esso, vegna tjóns sem Sigurður telur sig hafa orðið fyrir vegna ólöglegs samráðs stóru olíufélaganna þriggja.

Neytendasamtökin hafa staðið við bakið á Sigurði í málarekstrinum en hann sneri sér til samtakanna í kjölfar þess að samkeppnisyfirvöld komust að þeirri niðurstöðu að olíufélögin hefðu gerst sek um ólöglegt samráð á árunum 1993–2001.

Sigurður gat lagt fram gögn í Hæstarétti sem sýndu að á árunum 1995–2001 keypti hann bensín af Esso fyrir tæplega 1,2 milljónir króna. Aðalkrafa hans fyrir dómi var að Ker, sem þáverandi eigandi Esso, yrði dæmt til að greiða honum 180 þúsund krónur, varakrafan var 35 þúsund krónur og þrautavarakrafa 26 þúsund krónur. Þrautaþrautavarakrafa var að honum yrðu dæmdar bætur að álitum dómsins. Héraðsdómur hafði sýknað Ker af aðal- og varakröfu og vísaði hinum kröfunum frá dómi.

Dómur Héraðsdóms Reykjavíkur