Talsmaður neytenda, Gísli Tryggvason, hefur ritað stærstu símafyrirtækjum landsins, Símanum og Vodafone, bréf. Þar er þeim boðið að upplýsa um raunkostnað við útsendingu reikninga, að því er fram kemur á heimasíðu embættisins. Er það gert í ljósi þess að neytendur eigi rétt á fullri sundurliðun fjarskiptareikninga endurgjaldslaust.

Þá gaf talsmaður neytenda símafyrirtækjunum rúmlega vikufrest til að gera athugasemdir við upplýsingar hans um raunkostnað við útsendingu reikninga. Telur talsmaður neytenda að hann sé í mesta lagi 105 krónur. Einnig spyr talsmaður neytenda um raunkostnað fyrirtækjanna við "útsendingu reikninga" og gjöld sem þau leggja á vegna sundurliðunar og útsendingar reikninga.

Í nýrri umsögn sinni til Alþingis varar talsmaður neytenda við því að símafyrirtæki fái að óbreyttu tækifæri til að sniðganga skarpari reglur um að neytendur eigi rétt á fullri og endurgjaldslausri sundurliðun símreikninga. Eftir samþykkt fyrrgreinds frumvarps á sú sundurliðun að ná til allra símanúmera og annarrar þjónustu.

Þá ítrekaði talsmaður neytenda í umsögn til samgöngunefndar tillögu sem hann lagði fram í fyrri umsögn til samgönguráðuneytis. Hún felur í sér að "sett verði hámark á kostnað eða takmörk við kostnaði sem símafyrirtæki geti lagt á neytendur vegna útsendingar reikninga – enda eigi sundurliðun allra símtala að vera endurgjaldslaus samkvæmt EES-reglum og frumvarpinu sem til umsagnar er."

Í fyrri umsögn sinni benti talsmaður neytenda m.a. á að eini augljósi kostnaðurinn við útsendingu reikninga væri kostnaður við burðargjald og e.t.v. umslag. Ekki sé rætt um í tilvitnuðum lögskýringargögnum að heimildin nái til reikningsgerðar eða útprentunar.