Karlmaður var í Héraðsdómi Vesturlands í gær dæmdur í níu mánaða fangelsi, en fresta skal fullnustu 6 mánaða af refsingunni og falli sá hluti hennar niður að þremur árum liðnum frá uppkvaðningu dómsins haldi ákærði almennt skilorð, fyrir vörslu barnakláms. Verða 5.794 útprentaðar ljósmyndir, Laser turntölva og HP Compaq tölva gerð upptæk.

Í ákæruskjali segir að málið sé höfðað gegn manninum „fyrir vörslu á barnaklámi með því að hafa í október 2006 haft í vörslu sinni 11.382 ljósmyndir og 10 hreyfimyndir, sem hann aflaði sér frá árinu 1998 að telja, sem sýna börn á kynferðislegan eða klámfengin hátt. Var nánar tiltekið um að ræða 5.794 útprentaðar ljósmyndir, 597 ljósmyndir sem voru á hörðum diski í Laser turntölvu í eigu ákærða, 3.774 ljósmyndir og 10 hreyfimyndir sem voru á hörðum diski í HP Compaq tölvu í eigu ákærða og 1.217 ljósmyndir sem voru á hörðum diski í HP Compaq tölvu sem ákærði hafði til umráða á vinnustað sínum.

Voru tölvurnar í eigu ákærða og útprentaðar ljósmyndir haldlagðar af lögreglu við húsleit á heimili hans þann 11. október 2006 og harður diskur í tölvu sem ákærði hafði til umráða á vinnustað sínum haldlagður við húsleit þar sama dag.

Í dómnum kemur fram að maðurinn játaði skýlaust að hafa framið það brot sem honum er gefið að sök í ákæru og er játning hans studd sakargögnum.

Maðurinn er með hreint sakavottorð og var litið til þess við ákvörðun refsingar. Þá horfir það manninum til málsbóta að hann hefur leitað til sálfræðings vegna sjúklegrar klámfíknar.

Við ákvörðun refsingar var á hinn bóginn virt manninum til refsiþyngingar það mikla magn af myndefni sem hann hafði í vörslum sínum og sýnir börn á ýmsum aldri á kynferðislegan og klámfengin hátt.

Er þess þá einnig að gæta að mikill hluti myndanna er af grófasta tagi þar sem fram koma svívirðilegustu kynferðisbrot gegn börnum. Loks ber til þess að líta að hluta efnisins var ákærði með í sínum vörslum á vinnustað sínum í skóla, en með því braut hann gróflega gegn því trausti sem hann naut sem kennari við skólann.