Flugfélag Íslands er tíu ára í dag en félagið var stofnað með sameiningu innanlandsdeildar Flugleiða og Flugfélags Norðurlands. Í upphafi var reksturinn mjög erfiður og það var ekki fyrr en árið 2002 sem hagnaður varð af rekstri félagsins og þannig hefur það verið síðan. Fyrsta starfsárið voru farþegar félagsins um 250 þúsund en á síðasta ári voru fluttir farþegar rúmlega 370 þúsund. Í heildina hafa á þessum 10 árum yfir 3 milljónir farþega flogið með félaginu, að því er segir í tilkynningu.

Flugfélag Íslands flýgur í dag á milli Reykjavíkur og Ísafjarðar, Akureyrar, Egilsstaða og Vestmannaeyja, frá Akureyri er flogið til Grímseyjar, Vopnafjarðar og Þórshafnar. Sú nýjung verður í boði í sumar að flogið verður milli Akureyrar og Keflavíkur og er það flug eingöngu hugsað fyrir farþega á leið í millilandaflug enda er flugáætlun sett upp þannig að hún henti mjög vel þeim farþegum sem eru á leið til og frá landinu. Flugið er í samstarfi við Icelandair og selt í þeirra dreifikerfum.

Flugfélag Íslands mun í sumar í fyrsta skiptið bjóða uppá beint flug milli Keflavíkur og Nuuk, höfuðstaðar Grænlands. Það eru nýjar flugvélar félagsins DASH 8 sem keyptar voru á síðasta ári sem gera þetta flug mögulegt, en þær geta lent á mjög stuttum flugbrautum eins og eru í Nuuk.