Dýrara að skrá lén hér en annars staðar
Fimmtán sinnum dýrara er að skrá lén á Íslandi en í Bretlandi og fjórum sinnum dýrara að skrá lén hér á landi en í Danmörku. Sigurður Halldórsson, framkvæmdastjóri Netvistunar, segir að það skorti reglur um það hverjum er heimilt að skrá lén. Þær reglur séu nú ekki fyrir hendi og skráning af þessu tagi eigi að vera í höndum stjórnvalda. Þá skorti einnig samkeppni á þessu sviði.
Sigurður benti á að Netvistun ætti lénið ísland.is Til stæði að forsætisráðuneytið opnaði vefsetrið island.is á UT deginum á miðvikudaginn kemur og sá vefur væri alls staðar kynntur sem ísland.is Það væri ekki eðlilegt að hvor aðilinn gæti skráð sitt lénið eftir því hvort það væri með íslenskum stöfum eða ekki. Það væri til þess fallið að valda ruglingi, en engar reglur væru í gildi sem kæmu í veg fyrir að þetta væri gert, eins og nú væri málum háttað. Nú væri búið að leggja út í mikinn kostnað vegna Íslandsvefjarins, markaðssetningu og fleira og alltaf talað um ísland.is með í-i. Það kæmi sér illa þegar vefurinn yrði opnaður að forsætisráðuneytið ætti ekki vefsvæðið ísland.is, þó svo það ættu island.is með i-i.
Býður upp á árekstra
"Fyrirkomulagið eins og það er í dag býður upp á árekstra. Það er ekkert forgangsréttarákvæði eða neitt slíkt, eins og þyrfti að vera, enda teljum við að það sé eðlilegt að á vegum ríkisins sé stofnun sem sjái um þessa úthlutun með svipuðum hætti og fyrirtækjaskrá. Þú skráir ekki firmanafn nema það sé búið að samþykkja það og athuga hvort það sé skráð fyrir og þess háttar. Það mætti hafa fyrirtækjaskrá sem fyrirmynd í þessum efnum," sagði Sigurður.Hann sagði að síðan væri eðlilegt að þeir aðilar sem uppfylltu þau skilyrði sem sett væru hefðu heimild til þess að úthluta lénum til að stuðla að meiri samkeppni á þessu markaði, en Isnic hefði nú einkarétt á úthlutun léna.
