Ólafur Loftsson, formaður Félags grunnskólakennara, segist bæði sáttur og ósáttur við tillögu ríkissáttasemjara sem samþykkt var í gær af fulltrúum Kennarasambands Íslands annars vegar og fulltrúa Launanefndar sveitarfélaga hins vegar. Hann sé ósáttur við að ekki sé mætt nema að litlu leyti þeirri efnahags- og kjaraþróun sem orðið hafi á samningstímabilinu.

Viðræðurnar snerust um grein 16.1 í kjarasamningi KÍ og LN, en hún snýst um að fara eigi yfir efnahags- og kjaraþróun frá 2004- 2006 og meta til hvaða aðgerða eigi að grípa.

„Það var ekki áhugi hjá Launanefnd sveitarfélaganna fyrir því að fara í einhverja úrskurðarnefnd og við töldum að það myndi ekkert meira koma út úr viðræðum við sveitarfélögin. Því stóð valið milli þess að hætta viðræðum, gera ekkert og segja samingunum upp um næstu áramót eða fallast á tillögu ríkissáttasemjara,“ segir Ólafur.

Ólafur segir samninganefnd kennara hafa talið það óhagstæðan tíma að vera með lausan kjarasamning um næstu áramót, því þá væri félagið fyrst allra til að standa í kjaraviðræðum og af því hafi það ekki góða reynslu. „Við förum í markvissa vinnu með sveitarfélögunum strax, með það að markmiði að leggja grunn að kjarasamningi sem við getum lagt fram í maí á næsta ári,“ segir Ólafur.

Ólafur segir að með því að gera þetta svona aukist líkurnar á því að ekki komi til átaka um kjör kennara. Ef ekkert hefði verið að gert hefði legið fyrir að kennarar hefðu staðið uppi samningslausir um næstu áramót. Ólafur segir kennara hafa talið eðlilegt, miðað við efnahags- og kjaraþróun, að samið yrði um 6-8% launahækkun. Tillögu ríkissáttasemjara megi meta sem ígildi um 4% hækkunar en tryggi engu að síður 6% grunnkaupshækkun allra grunnskólakennara.