Álver Alcan í Straumsvík mbl.is/Sverrir

„Hagur Hafnarfjarðar sakar okkur um ólýðræðisleg og ósanngjörn vinnubrögð vegna þess að samtökin fá ekki að halda framsögu eða hafa fulltrúa í pallborði á fundinum.

Á fundinum verða fluttar fjórar framsögur og að þeim loknum verða pallborðsumræður.

Þeir sem flytja framsögu eru tveir stjórnmálamenn, annar þeirra er fylgjandi stækkun en hinn ekki, og svo fulltrúi frá álverinu og fulltrúi frá Sól í Straumi.

Í pallborði voru svo áætlaðir, auk þeirra sem fara með framsögu, þrír bæjarfulltrúar, einn frá Sjálfstæðisflokki sem er fylgjandi stækkun, einn frá Vinstri grænum sem er á móti og einn frá Samfylkingunni sem mun hvorki beita sér með né á móti stækkun, heldur fjalla um forsendur íbúakosninga um stækkun.

Við sáum ekki ástæðu til að hafa fleiri en fjórar framsögur á fundinum og þar að auki þrjá bæjarfulltrúa í pallborði vegna ótta við tímaskort. Þar að auki töldum eðlilegt að hafa jafnmarga aðila sem eru fylgjandi stækkun og sem eru andvígir stækkun.

Þau rök Hags Hafnarfjarðar að þau séu fylgjandi stækkun á öðrum forsendum en Alcan og ættu skilyrðislaust að fá að koma eru ekki fullnægjandi, enda eru mörg félög andvíg stækkun á öðrum forsendum en Sól í Straumi þó svo að þeim sé ekki boðið. Það er alveg ljóst að ekki geta öll samtök sem láta sig málið varða verið með framsögu eða fulltrúa í pallborði á fundinum, og er það okkar skoðun að fyrirkomulag fundarins sé bæði eðlilegt og lýðræðislegt og höfnum við því alfarið gagnrýni Hags Hafnarfjarðar," að því er segir í sameiginlegu svari frá ungliðahreyfingum stjórnmálaflokkanna í Hafnarfirði.

„Einnig er nauðsynlegt að leiðrétta rangfærslu í málflutningi Hags Hafnarfjarðar, en á heimasíðu þeirra segir: „Upphaflega var okkur boðin þátttaka í fundinum en það boð hefur nú verið dregið til baka vegna mótmæla frá öðrum þátttakendum.“ Þetta er alrangt.

Ástæður þess, að Hagur Hafnarfjarðar fær ekki að vera með framsögu eða fulltrúa í pallborði á fundinum, hafa þegar verið útskýrðar hér að ofan og hafa ekkert með skoðanir annarra þátttakenda að gera.

Þetta eiga forsvarsmenn að vita, en þeim var gert grein fyrir þessu í tölvupósti 11. mars síðastliðinn, þar sem segir að skipulag fundarins sé með þeim hætti að það ættu að vera jöfn hlutföll þeirra sem væru fylgjandi og á móti stækkun.

Vel má vera að Hagur í Hafnarfirði hafi misskilið fyrrgreindan tölvupóst og hefur með þessu svari verið reynt að leiðrétta þann misskilning. Engu að síður saka þeir fundarhaldara um að ganga erinda ákveðinna hópa og útiloki önnur sjónarmið eftir pöntun. Þetta eru alvarlegar ásakanir sem eiga ekki við nokkur rök að styðjast og förum fram á að þær verði leiðréttar hið snarasta.

Vilja ungliðahreyfingarnar koma því á framfæri að vegna mikillar umræðu og áhuga á fundinum, verði hann lengdur og fleiri aðilum boðið fulltrúar í pallborð. Þó verður ekki vikið frá því skipulagi sem upphaflega var ákveðið að hafa jafn marga aðila með stækkun og á móti," að því er segir í tilkynningu frá ungliðahreyfingum stjórnmálaflokkanna í Hafnarfirði.