Héraðsdómur Austurlands hefur dæmt karlmann í 30 daga skilorðsbundið fangelsi fyrir að ráðast í leyfisleysi inn á heimili fyrrum eiginkonu sinnar. Maðurinn var hins vegar sýknaður af ákæru fyrir að hafa ráðist á konuna og veitt henni áverka. Maðurinn var dæmdur til að greiða hluta sakarkostnaðar.

Þetta gerðist á Fáskrúðsfirði síðla kvölds í maí á síðasta ári. Maðurinn var þá fluttur frá bænum til Reykjavíkur en fram kom í dómnum, að samband milli hans og fyrrum eiginkonu hans var ekki gott og skilnaðarmál þeirra ófrágengið. Hélt hann því fram að konan hefði meinað sér að hitta dætur þeirra.

Dómurinn taldi sannað að maðurinn hefði ruðst óboðinn inn í húsið og eignarhald hans á húsinu og sú staðreynd að dætur hans dvöldu þar hafi ekki veitt honum rétt til þess.

Konan sagði, að maðurinn hefði ráðist á hana þar sem hún sat við eldhúsborðið og veitt henni áverka þar til karl og kona, sem voru gestkomandi í húsinu, gengu á milli. Segir dómurinn að framburður konunnar hafi verið staðfastur um þetta og þyki skýr, greinargóður og trúverðugur. Vitnin tvö hafi þó ekki staðfest þessa frásögn og maðurinn hafi staðfastlega neitað því að hafa veist að eiginkonu sinni. Sé því ósannað gegn neitun mannsins, að hann hafi gerst sekur um líkamsárás.