Tilhæfulaus ábyrgðaryfirlýsing sem gefin var út af fyrrverandi framkvæmdastjóra Verðbréfaþjónustu Sparisjóðanna (VSP) og upp komst um í síðustu viku var gefin vegna lántöku fyrirtækis í Arizonaríki í Bandaríkjunum. Samkvæmt upplýsingum frá Helga Magnúsi Gunnarssyni, yfirmanni efnahagsbrotadeildar ríkislögreglustjóra, getur það torveldað rannsókn málsins að einhverju leyti en ekki er loku fyrir það skotið að fulltrúar ríkissaksóknara vilji kanna fyrirtækið nánar.

Rannsókn málsins er á frumstigi en það komst upp í síðustu viku þegar erlendur banki leitaði eftir upplýsingum hjá VSP um ábyrgðaryfirlýsingu um rúmlega 13 milljarða króna innistæðu á bankareikningi. Þá fjármuni var hins vegar hvergi að finna. Í kjölfarið var framkvæmdastjóra VSP vikið úr starfi og málið sent ríkislögreglustjóra. Framkvæmdastjórinn var staddur erlendis þegar málið kom upp og ætlaði síðan að halda aftur utan en komið var í veg fyrir það með farbanni. Helgi Magnús segir að þar sem maðurinn sé til rannsóknar sé eðlilegt að fara fram á farbann yfir honum, ekki síst þar sem hann hugðist yfirgefa landið – og lögregla þarf hugsanlega að ná af honum tali í tengslum við rannsókn málsins.

Samkvæmt upplýsingum frá Helga Magnúsi fóru fram yfirheyrslur um liðna helgi en hann gat ekki staðfest það sem kom fram í frétt Blaðsins í gær að kunningi framkvæmdastjórans fyrrverandi ræki bandaríska fyrirtækið né að málið tengdist viðskiptum við taílenskt fyrirtæki. Hann varðist einnig fregna af hugsanlegum vitorðsmönnum. Ekki hefur verið ráðinn nýr framkvæmdastjóri VSP en unnið er að því.