Tæplega 70 fyrirtæki tóku í vetur þátt í í atvinnutengdu námi á vegum Vinnuskóla Reykjavíkur og 63 nemendur útskrifuðust af 85. Nemendur í Atvinnutengdu námi vinna tvo til þrjá daga á viku meðfram skólagöngu en verkefnið er ætlað fyrir nemendur, sem búa við mikla námserfiðleika eða námsleiða.

Verkefnið felst í því að nemendur í efstu bekkjum grunnskóla, sem uppfylla tiltekin inntökuskilyrði, fá tækifæri til að fræðast um atvinnulífið og taka þátt í því samhliða skólagöngu í grunnskóla. Aðalmarkmið atvinnutengda námsins er að bæta líðan nemenda og gefa þeim tækifæri til að vinna með styrkleika sína og öðlast nýtt sjálfsmat.

Fulltrúum atvinnulífsins var í gær boðið til veislu um leið og þeir skrifuðu undir vitnisburð nemenda. Á heimasíðu umhverfissviðs Reykjavíkur segir Pétur Sævarsson, verkfræðingur hjá Eykt, að þar hafi einn drengur starfað við góðan orstír.

„Hann var handlangari hjá okkur og gekk starfið mjög vel. Smiðirnir tóku hann í fóstur og gættu að því að honum liði vel hjá okkur í Borgartúni og reyndist hann góður starfskraftur," segir Pétur.

Einar Hauksson kennari í Engjaskóla var einnig mjög ánægður með starfskraftinn sinn sem var einskonar aðstoðarkennari í smíðastofum hjá 1.-4. bekk. „Nemendur tóku honum mjög vel og þetta var alveg til fyrirmyndar," segir Einar.

Frá árinu 1994 hafa tæplega 800 nemendur lagt stund á atvinnutengt nám.