Vinir og ættingjar og aðrir áhugasamir fjölmenntu þegar bræðurnir Einar og Sverrir Þorsteinssynir hófu hnattreisu sína á vélhjólum í blíðskaparveðri frá Kletthálsi rúmlega 10 í dag. Það var létt yfir bræðrunum sem áttu hálf erfitt með að trúa því að stóri dagurinn væri loks runninn upp. „Þetta leggst ótrúlega vel í okkur og er mjög spennandi,“ sagði Sverrir í samtali við mbl.is í dag.

„Við sváfum nú vel í nótt og þetta er að síga inn,“ sagði Sverrir. „Það sem er óraunverulegast er tímalengdin. Ég held að maður geri sér enga grein fyrir því að þetta er þriggja mánaða törn framundan,“ sagði Einar. Þá sögðu þeir bræður allan undirbúning, sem hefur verið afar mikill, hafa gengið samkvæmt áætlun.

Um tugur hjólreiðakappa lögðu af stað með þeim Einari og Sverri og ætla að hjóla með þeim fyrsta spölinn, en stefnan er tekin á Egilsstaði. Á morgun munu þeir síðan ferðast með Norrænu til Færeyja. „Við erum svo glaðir að sjá svolítið af hjólamönnum koma sem ætla að fylgja okkur úr hlaði. Það er rosalega gaman,“ sagði Sverrir.

Ferðin á að taka um þrjá mánuði og alls munu þeir ferðast rúmlega 30.000 km.

Áður en þeir hjóluðu af stað fengu þeir prest, sem var einnig vélhjólakona, til að fara með stutta ferðabæn og blessa ferðalagið. Að því loknu voru vinir og ættingjar kvaddir, vélarnar þandar og brunað af stað.

Ferðasíða bræðranna

Myndskeið um undirbúning ferðalagsins.