Bragi Steingrímsson var á handfærum um helgina og fékk nokkuð af smáufsa sem var fullur af síli. "Þetta var svona 8 sentimetra langt síli og á svæðinu innan við Elliðaey voru lóðningar, sem bentu til þess að þar væri síli á ferð. Það var líka töluvert af svartfugli og lunda í þessu. Hvað þetta er mikið veit ég ekki, hvort þetta er nóg til að bjarga fuglinum, til að lundinn, svartfuglinn, rytan og krían nái að koma upp ungum. Það hefur gengið illa undanfarin ár. Vonandi er nóg af síli á ferðinni núna," segir Bragi. Í gær sáu menn svo miklar lóðningar af sandsíli við eyjarnar og var mikið af súlu í því og hvalur líka.

Mjög lítið hefur verið um síli við landið tvö síðustu árin og varp fugla, sem eru háðir því í fæðuöflun hefur því misfarizt að stórum hluta. Sandsílið hefur lítið verið rannsakað, þrátt fyrir að það sé mikilvæg fæða fyrir sjófugla og fiska. Ekki liggur því fyrir hvers vegna lítið hefur verið um sílið að undanförnu.