Maðurinn hefur setið í gæsluvarðhaldi frá því í lok mars. Rannsókn málsins er á lokastigi en niðurstöðu geðrannsóknar á piltinum er að vænta í þessum mánuði. Hefur sú rannsókn tekið lengri tíma en ráðgert var vegna hegðunar piltsins.

Í úrskurði héraðsdóms er vísað til greinargerðar lögreglu þar sem segir, að svo virðist sem pilturinn hafi með tilviljanakenndum hætti ráðist að stúlkunni í því skyni að eiga við hana kynferðismök. Virðist sem hending ein hafi ráðið því hver hafi orðið fyrir hinni meintu árás enda virðist mega ráða af myndskeiðum af vettvangi að einungis 18-20 mínútur hafi liðið frá því að maðurinn og konan hittust fyrst, þar til maðurinn kemur upp úr kjallara hótelsins, þar sem árásin var gerð.

Lögreglan segist telja háttsemi mannsins mjög alvarlega og að öðrum konum kunni að vera hætta búin gangi maðurinn laus. Ríkir almannahagmunir krefjist þess að maðurinn sæti áframhaldandi gæsluvarðhaldi

Héraðsdómur féllst á rök lögreglu sem og meirihluti Hæstaréttar. Einn dómari af þremur, Jón Steinar Gunnlaugsson, vildi hins vegar fella úrskurð héraðsdóms úr gildi og segir hann í sératkvæði, að samkvæmt fordæmum Hæstaréttar séu ströng skilyrði fyrir því að sakborningar verði látnir sæta gæsluvarðhaldi á grundvelli lagaákvæðis um almannahagsmuni. Það styðjist meðal annars við túlkun Mannréttindadómstóls Evrópu, sem hafi talið það vera skilyrði fyrir gæsluvarðhaldi af þessum toga að löggæsluyfirvöld sýni fram á að það muni valda röskun á almannafriði ef sakborningi yrði sleppt.

Jón Steinar segir, að pilturinn sé 18 ára gamall og engar upplýsingar liggi fyrir í málinu um að hann eigi sakarferil að baki. Þá hafi lögregla ekki fært fram marktæk rök fyrir því að skilyrði séu til áframhaldandi gæsluvarðhalds yfir piltinum með tilliti til almannahagsmuna.