„Forvarnir eru besta leiðin!" er yfirskrift ráðstefnu um forvarnir gegn kynferðislegu ofbeldi gagnvart börnum á Íslandi sem fram fer dagana 24. og 25. maí nk. í húsakynnum Kennaraháskóla Íslands. Að ráðstefnunni standa Barnaverndarstofa, Blátt áfram, Félag heyrnarlausra, Háskólinn í Reykjavík, Styrktarfélag lamaðra og fatlaðra, Þroskahjálp, Stígamót og Neyðarlínan 112.

Bandarískir sérfræðingar

Samkvæmt upplýsingum ráðstefnuhaldara er markmiðið með ráðstefnunni að skoða allar þær leiðir sem vænlegar eru til að fyrirbyggja kynferðislegt ofbeldi gegn börnum.

Á ráðstefnunni munu fjórir sérfræðingar frá Bandaríkjunum segja frá því nýjasta í rannsóknum, forvörnum og úrræðum. Þannig mun David Burton kynna rannsóknir á tíðni og úrræðum, Robert E. Longo fjallar um nýjar leiðir í úrræðum fyrir unga gerendur, Shirley Paceley fjallar um kynferðislegt ofbeldi gagnvart greindarskertum og fötluðum og John C. Patterson leiðbeinir um forvarnir og áhættumat á vinnustöðum.

Auk þeirra flytja erindi þau Valdís Ívarsdóttir sem kynna mun rannsóknir Félags heyrnarlausra á tíðni kynferðisofbeldis meðal heyrnarlausra og heyrandi barna og Svava Björnsdóttir, frá samtökunum Blátt áfram, mun fjalla um fræðslu og þjálfun starfsmanna og sjálfboðaliða sem vinna með börnum og unglingum í því skyni að fyrirbyggja, þekkja og bregðast við kynferðislegri misnotkun barna á ábyrgan og réttan hátt.

Barnahús sótt heim

Ráðstefnan fer fram á ensku og er öllum opin. Allar nánari upplýsingar um ráðstefnuna og fyrirlesara má nálgast á vefslóðinni: www.blattafram.is. Þar er einnig hægt að skrá þátttöku sína. Þess má geta að ráðstefnugestum er miðvikudaginn 23. maí boðið að heimsækja Barnahús. Ráðstefnan er styrkt af verkefnasjóð dóms- og kirkjumálaráðuneytisins um mannúðarmál, heilbrigðis- og tryggingarmálaráðuneytinu, félagsmálaráðuneytinu og landbúnaðarráðuneytinu.