Jóhanna Sigurðardóttir félagsmálaráðherra segir allra leiða munu verða leitað til að aðstoða þá erlendu starfsmenn fiskvinnslunnar Kambs á Flateyri sem eigi ekki rétt á atvinnuleysisbótum sökum þess að þeir séu frá ríkjum utan Evrópska efnahagssvæðisins, EES. Finnbogi Sveinbjörnsson, formaður Verkalýðsfélags Vestfirðinga, skoraði í fyrradag á ráðherrann að beita sér í málinu og segir Jóhanna að reynt verði að finna fólkinu ný störf.

"Þetta eru líka einstaklingar sem kannski samkvæmt ströngustu túlkun væri hægt að vísa úr landi," segir Jóhanna, sem bætir því við að þeim verði gefið svigrúm til að sækja um atvinnuleyfi út frá nýjum forsendum. Síðan myndu þeir ganga með sama hætti og aðrir í allar vinnumarksaðgerðir sem yrðu gerðar á svæðinu.

"Ég geri ráð fyrir því að þeir sem eru með lögheimili á staðnum eigi rétt á að fá fjárhagsaðstoð frá félagsþjónustu sveitarfélaga þó að þeir eigi ekki rétt á atvinnuleysisbótum, þann tíma sem það tekur að útvega þeim ný störf."

Litið til reynslunnar af Glámu

Á sama tíma lagði meirihluti bæjarstjórnar Ísafjarðar fram tillögu sem felur í sér að atvinnumálanefnd bæjarins kanni möguleika á að stofna almenningshlutafélag sem einstaklingar, sveitarfélög, félagasamtök og fyrirtæki á norðanverðum Vestfjörðum ættu aðild að. Yrði markmið félagsins að kaupa veiðiheimildir og þannig tryggja fullvinnslu sjávarafurða á svæðinu.

Litið verður til reynslu af eignarhaldsfélaginu Glámu, en Gláma ehf. var stofnað 2002 með aðild Byggðastofnunar og nokkurra fyrirtækja á suðurhluta Vestfjarða, Þingeyri og á Drangsnesi. Í tillögunni er atvinnumálanefnd gert að skila tillögum til bæjarstjórnar eigi síðar en 15. júní nk.