Náttúruverndarsamtök skora á ríkisstjórnina að stöðva framkvæmdir

Náttúruverndarsamtök Íslands skora á ríkisstjórn Íslands að stöðva framkvæmdir og undirbúning virkjana í neðri hluta Þjórsár. Í ályktun samtakanna segir að ekkert heildarmat hafi verið gert á gildi né sérstöðu náttúru og landslags við neðri hluta Þjórsár, en ljóst sé að virkjunarframkvæmdir þar munu hafa mikil áhrif og valda tjóni.

„Eyjar, fossar og lífríki árinnar er í hættu, verði af þessum framkvæmdum, sem mikil andstaða er við meðal almennings," segir ennfremur í ályktuninni.

Samtökin segja það sæta furðu að Landsvirkjun skuli hafa tekið tilboði um hönnun, ráðgjöf og aðstoð þriggja fyrirtækja á framkvæmdatíma virkjananna. Og að það hafi verið gert þótt enn sé ósamið við landeigendur á svæðinu, þótt framkvæmdaleyfi sé ófengið, þótt virkjanir séu ekki komnar inn á skipulag allra sveitarfélaganna.

Náttúruverndarsamtökin skora á stjórnvöld að verja Þjórsá gegn frekari ágangi og eyðileggingu alla leið úr Þjórsárverum og niður til sjávar.

• 3 blogg um fréttina

Bloggað um fréttina

• Magnús Helgi Björgvinsson: Bananalýðveldis-hugsunarháttur
• Sigurlaug B. Gröndal: Þorlákshafnarbúar spurðir einskis!
• Árni Þór Sigurðsson: Landsvirkjun slakar hvergi á klónni!