Ísland sækist eftir sæti í öryggisráðinu starfsárin 2009 og 2010. Tyrkland og Austurríki eru einnig í framboði til sætanna tveggja sem Evrópuþjóðir, auk Ástralíu, Kanada og Nýja-Sjálands, fylla en kosningin fer fram í október 2008. Kosningabaráttan er tekin að harðna nokkuð en meðal þess sem íslenska utanríkisþjónustan leggur nú áherslu á er að fá umsvifamikla aðila í útrás íslenskra fyrirtækja til liðs við sig og var af því tilefni boðað til fundar í utanríkisráðuneytinu í gær. Gerði Grétar Már Sigurðsson ráðuneytisstjóri viðstöddum grein fyrir gangi mála í kosningabaráttunni.

Meðal þess sem fram kom í máli Grétars Más var m.a. að oft skipti óformlegt tengslanet miklu máli. Tók hann dæmi um hjálparstarf sem Njörður P. Njarðvík hefur staðið fyrir í Afríku nokkur undanfarin misseri, en það varð nýverið til þess að lítið Afríkuríki hét Íslandi stuðningi sínum í baráttunni um sæti í öryggisráðinu.

Meira en 100 þjóðir hafa heitið Íslandi stuðningi, en þá er aðeins talað um skrifleg loforð eða þau sem mjög háttsettir embættismenn hafa gefið. Þetta þykir mjög gott, átján mánuðum fyrir atkvæðagreiðsluna, en Grétar Már tók sem dæmi að Norðmenn hefðu haft 145 loforð í hendi er þeir fóru inn í ráðið síðast, 2001-2002. Engum blöðum væri þó um það að fletta að samkeppnin væri mikil og engan veginn víst að Ísland næði settu marki þegar á hólminn væri komið. Reynslan sýndi að ekki öll loforð skiluðu sér á kjördag.