mbl.is/Kristinn Ingvarsson

Í tilkynningu kemur fram að Reykjavíkurborg hefur þegar tekið slíka ákvörðun og þess vegna vonast námsmannahreyfingarnar eftir því að hin sveitarfélögin á höfuðborgarsvæðinu fylgi í kjölfarið.

„Kostir þess að veita námsmönnum frítt í strætó eru fjölmargir. Félagstofnun stúdenta gerði í maí könnun á meðal stúdenta við Háskóla Íslands þar sem m.a. var spurt hvernig nemendur ferðuðust til og frá skóla. Í dag nota 9% stúdenta við HÍ strætó til þess að komast í skólann á meðan 66% koma á einkabíl og 25% koma gangandi eða á hjóli. Þegar spurt var hvernig nemendur myndu ferðast í skólann ef frítt yrði gefið í strætó svöruðu 43% að þeir myndu taka strætó, 35% að þeir myndu nota einkabílinn og 21% að þeir myndu ganga eða hjóla.

Þessar niðurstöður gefa sterklega til kynna að stúdentar geta vel hugsað sér að taka strætó í verulega auknum mæli og að verðið á þjónustunni skipti þá miklu máli. Umferðarþungi og mengun, t.d. í formi svifryks, eru að verða vaxandi vandamál á höfuðborgarsvæðinu og sveitarfélögin hljóta að vilja bregðast við því. Þarna geta stjórnarmenn í Strætó bs. séð svart á hvítu hvaða kostir gætu fylgt því að gefa stúdentum frítt í strætó," að því er segir í fréttatilkynningu frá SHÍ og BÍSN.