R. Nicholas Burns aðstoðarutanríkisráðherra Bandaríkjanna og náinn samstarfsmaður Condoleezzu Rice utanríkisráðherra Bandaríkjanna mun heimsækja Ísland þann 14. júní í boði Ingibjargar Sólrúnar Gísladóttur utanríkisráðherra. Hann mun taka þátt í viðræðum um öryggis- og varnarmál en slíkar viðræður eru hluti af samkomulagi um varnarmál sem íslensk og bandarísk stjórnvöld undirrituðu sl. haust.

Auk samtala við íslenska ráðamenn um samstarf Íslendinga og Bandaríkjamanna í öryggis- og varnarmálum mun Burns ræða við þá um ástand heimsmálanna. Einnig mun hann eiga fund með Geir H. Haarde forsætisráðherra, að því er segir í tilkynningu frá bandaríska sendiráðinu.

Burns mun heilsa upp á Sturlu Böðvarsson forseta Alþingis og skoða Alþingi Íslendinga í hans fylgd.

Burns hefur undanfarin tvö ár sem aðstoðarutanríkisráðherra verið helsti fulltrúi bandaríska utanríkisráðuneytisins í málum eins og kjarnorkudeilunni við Íran, deilunni um framtíð Kosovo, og í samstarfi Bandaríkjanna og Evrópu í stríðinu gegn hryðjuverkum. Áður en hann var skipaður aðstoðarutanríkisráðherra var Burns fastafulltrúi Bandaríkjanna hjá NATO og sendiherra Bandaríkjanna í Grikklandi frá 1997 til 2001. Á árunum 1995 til 1997 var hann talsmaður bandaríska utanríkisráðuneytisins.

Nicholas Burns sat í þjóðaröryggisráði Bandaríkjanna frá 1990 til 1995, þar sem hann var sérlegur ráðgjafi Bills Clintons og hafði einnig yfirumsjón með málefnum Rússlands, Úkraínu, Tyrklands og Kákasusríkjanna.