Forsætisráðherrar Norðurlandanna hittast á sumarfundi sínum í Punkaharju í Finnlandi dagana 18. og 19. júní. Matti Vanhanen forsætisráðherra Finnlands er gestgjafi á fundinum. Fredrik Reinfeldt, Jens Stoltenberg, Anders Fogh Rasmussen og Geir H. Haarde taka þátt í fundinum. Halldór Ásgrímsson framkvæmdastjóri Norrænu ráðherranefndarinnar tekur einnig þátt í fundinum á þriðjudagsmorgun.

Í fréttatilkynningu segir að forsætisráðherrarnir munu meðal annars ræða áhersluatriði í tengslum við norrænt hnattvæðingarstarf auk annarra verkefna. Sameiginlegar aðgerðir eiga að efla samkeppnishæfni á Norðurlöndum, sjálfbæra þróun og velferð borgaranna.

Hugmyndir um samstarf á sviði hnattvæðingar eru rannsóknir og þróun, skapandi iðnaður og nýsköpun ásamt tækni sem notar litla orku og er umhverfisvæn.

Á fundinum verður einnig rætt um önnur málefni sem snerta Norðurlöndin, eins og Sameinuðu þjóðrinar, ESB og grannsvæðin, þar á meðal tengslin við Rússland.

Á meðan á heimsókninni stendur munu forsætisráðherrarnir meðal annars kynna sér Lusto rannsóknamiðstöðina um skógrækt, heimsækja Olofsborg í Nyslott og kynna sér hvernig timbri er fleytt.

Finnar gegna formennsku í Norrænu ráðherranefndinni á þessu ári.