Hjúkrunarfræðingar á Landspítala-háskólasjúkrahúsi segja gönguna vera skipulagða til vekja almenning til umhugsunar um afleiðingar hraðaksturs og þess að aka bíl undir áhrifum áfengis, fíkniefna eða lyfja.

Í fréttatilkynningu kemur fram að hópur hjúkrunarfræðinga á spítalanum hafði frumkvæði að viðburðinum og hefur nú þegar fengið baráttukveðjur og stuðningsyfirlýsingar úr mörgum áttum, meðal annars úr röðum slökkviliðsmanna, lögreglumanna, sjúkraliða og presta. Þá hafa forstjóri, hjúkrunarforstjóri og fleiri stjórnendur Landspítala-háskólasjúkrahúss lýst stuðningi við framtakið.

Safnast verður saman á þriðjudaginn við sjúkrabílamóttöku Landspítalans við Hringbraut, Eiríksgötumegin, og lagt af stað kl. 17:00. Gengið verður fram hjá slökkvistöðinni við Öskjuhlíð og áfram sem leið liggur að þyrlupallinum við LSH í Fossvogi.

Bríet Birgisdóttir, hjúkrunarfræðingur á gjörgæsludeild LSH, ávarpar göngufólk við upphaf ferðar og Anna Stefánsdóttir, hjúkrunarforstjóri LSH, flytur ávarp á leiðarenda.

Rauðu og svörtu blöðrunum verður sleppt við þyrlupallinn í fundarlok. Segir í tilkynningu að Þannig vilji aðstandendur göngunnar enda athöfnina táknrænt í minningu þeirra sem látið hafa lífið í umferðinni og til að sýna fórnarlömbum alvarlegra umferðarslysa samhug og samstöðu.