Miðbæjarfélag Selfoss skorar á bæjarstjórn Árborgar að breyta skipulagsferli deiliskipulags miðbæjar Selfoss, segja upp bindandi samningi frá 5. apríl 2006 og vinna skipulagið að nýju með breyttum áherslum, án kvaða um byggingamagn. Þetta kemur fram í ályktun félagsins sem borin var undir félagsmenn að loknum fjölmennum fundi um skipulagsmál miðbæjarins í gærkvöldi.

Vilji bæjarstjórn ekki fara þessa leið skorar fundurinn á hana að efna til íbúakosningar um tillögu að deiliskipulagi miðbæjarins.

Hlustað verði á raddir íbúa svæðisins

Þeir sem tóku til máls fyrir hönd Miðbæjarfélagsins sögðu það mikinn misskilning að félagið væri á móti uppbyggingu og auknu mannlífi í miðbænum. Hins vegar yrði að stíga varlega til jarðar og láta ekki gróðasjónarmið ráða för. Heillavænlegast væri að vinna málið í sátt við íbúa bæjarins.

Einhugur virtist ríkja um það á fundinum að ekki yrði hróflað við svokölluðum Bæjargarði, opnu grænu svæði í hjarta bæjarins, sem vinningstillögur að breyttu skipulagi gera ráð fyrir að verði notaður undir íbúðabyggð að hluta.

Á fundinum tók Friðbert Friðbertsson, forsvarsmaður Miðjunnar ehf., jafnframt til máls og reifaði hann sjónarmið fyrirtækisins, sem hyggst standa að uppbyggingu hluta svæðisins. Hann kvað þróunina vera þá að sveitarfélög litu í auknum mæli til uppbyggingar miðbæjarkjarna. Benti hann sérstaklega á Akureyri í því tilliti þar sem mikil uppbygging miðbæjarins stæði fyrir dyrum og sagði hann að þar væri þéttleiki byggðar mun meiri og nýtingarhlutfallið hærra heldur en í fyrirhugaðri byggð í hjarta Selfoss. „Það sem vakir fyrir okkur er að byggja upp huggulegan miðbæ. Við viljum ekki bara hlaða upp einhverjum fermetrum; einhver þarf að vilja búa þarna og kaupa þetta verslunarhúsnæði."