Eftir Guðmund Sv. Hermannsson
Gömul herflugvél af gerðinni Lockheed P-38F „Lightning" hélt í gærkvöldi á ný af stað í leiðangur, sem hófst árið 1942. En flugvélin, sem nefnist Glacier Girl eða Jöklastúlkan, var í hópi átta flugvéla, sem allar nauðlentu á Grænlandsjökli fyrir 65 árum en vélin náðist úr ísnum þar árið 1992 og hefur nú verið gerð upp. Flugvélin er væntanleg til Íslands á fimmtudag.

Flugvélin fór frá Teterboroflugvelli í New Jersey í Bandaríkjunum í gærkvöldi og er ferðinni heitið á flugsýninguna í Duxford á Englandi. Mun flugvélin m.a. millilenda í Goose Bay í Kanada, Kulusuk á Grænlandi, Reykjavík og Stornoway á Skotlandi.

Flugvélin hélt fyrst árið 1942 af stað frá Bandaríkjunum til Bretlands ásamt fimm öðrum Lockheed P-38F vélum og tveimur svonefndum fljúgandi virkjum, eða Boeing B-17E en um var að ræða fyrsta áfanga mikilla liðsflutninga sem þá voru fyrirhugaðir. Vélarnar voru yfir Grænlandsjökli og stefndu á Ísland þar sem taka átti eldsneyti en þá versnaði veðrið mikið og vélarnar hrakti af leið. Á endanum urðu þær eldsneytislausar yfir jöklinum um 160 km vestur af Kulusuk og nauðlentu allar. Alls voru 25 manns um borð í vélunum en þeim var öllum bjargað. Vélarnar grófust niður í jökulinn en fundust á ofanverðri síðustu öld og Glacier Girl náðist af um 90 metra dýpi.

Flugvélinni var fyrst flogið eftir viðgerð árið 2002 og hefur verið sýnd á nokkrum flugsýningum síðan. Nú á að fljúga henni yfir Atlantshafið á flugsýningu í Duxford á Englandi og er áætlað að vélin komi til Englands 29. júní. Gert er ráð fyrir því að flugvélin lendi á Íslandi á fimmtudag og fari héðan aftur á föstudag.