Það er slæmt að horfa á góðan bíl brenna

„Þetta var reglulega góð drossía sem var klárað að gera upp í fyrra, fullkláruð og í toppstandi. Það var mjög slæmt og erfitt að horfa á bílinn brenna inni í húsinu," sagði Baldur Róbertsson, bílaáhugamaður og einn eigenda bíla- og sprautuverkstæðisins Bílsins, en hann átti annan bílinn sem eyðilagðist í brunanum 16. júní, Pontiac Catalina, árgerð 1970.

"Maður trúir því ekki hvað eldur er fljótur þegar maður horfir á hann éta upp svona stað. En þetta er bara járn og mestu skiptir að enginn meiddist í þessum bruna. Það var starfsmaður þarna inni skömmu áður en eldurinn braust út. En bíllinn var búinn að vera þarna inni í tvo tíma. Ég ætlaði með hann í þrif fyrir fornbílasýninguna á þjóðhátíðardaginn," sagði Baldur en bíllinn bar númerið X-1. "Það númer fer á annan bíl, Bronco 1966, sem hefur verið lengi hér á Selfossi, var lengst af í eigu Jóns Sveinbergssonar mjólkurbílstjóra," sagði Baldur sem viðurkennir að hann hafi brennandi áhuga á ökutækjum og mótorhjólum.