Tillaga að matsáætlun fyrir 2. áfanga Sundabrautar hefur verið lögð inn til Skipulagsstofnunar. Tilgangur framkvæmdarinnar er að bæta samgöngur á norðurhluta höfðuborgarsvæðisins, bæta tengingu Vestur- og Norðurlands við höfðuborgarsvæðið, auka öryggi í samgöngum, létta á umferðarþunga á öðrum vegum, auka hagræði í samgöngum og atvinnustarfsemi og opna fyrir þróun byggðar á höfuðborgarsvæðinu til norðurs og norðausturs.

Fram kemur í tillögu að matsáætlun, að lagðir séu fram 3 kostir til mats á umhverfisáhrifum. Auk þeirra kosta, sem áður voru kynntir í drögum að tillögu að matsáætlun sé bætt við þriðja valkostinum, jarðgöngum undir Eiðsvík. Þá sé auk þess fjallað um tvær aðrar útfærslur af jarðgöngum, sem hafi verið skoðaðar verið í framhaldi af athugasemdum við drög að tillögu að matsáætlun, ásamt þeim möguleika að leggja brýr alla leið yfir Eiðsvík og Leiruvog í stað vegfyllinga. Þessar lausnir séu þó ekki kynntar sem valkostir fyrir mat á umhverfisáhrifum.

Mat á umhverfisáhrifum fyrir 2. áfanga hófst sl. sumar en þá voru kynnt drög að tillögu að matsáætlun og almenningi gafst tækifæri á að koma með athugasemdir. Ýmsar athugasemdir bárust og hefur verið tekið tillit til þeirra í tillögu að matsáætlun sem nú hefur verið send til málsmeðferðar hjá Skipulagsstofnun, sem mun væntanlega auglýsa hana til kynningar á næstu dögum.

Lögbundinn athugasemdafrestur er 2 vikur, en vegna sumarleyfa hefur frestur verið lengdur í rúmar 4 vikur og er því til 10. ágúst. Athugasemdum skal skila til Skipulagsstofnunar.

Verkfræðistofan Línuhönnun verkstýrir mati á umhverfisáhrifum fyrir hönd framkvæmaraðila, sem eru Vegagerðin og Reykjavíkurborg.

Heimasíða Skipulagsstofnunar