Fimmtán ára piltur, sem dæmdur var fyrir helgi í tuttugu mánaða fangelsi fyrir aðild sína að fjölmörgum lögbrotum, situr nú í gæsluvarðhaldi vegna hrottalegrar árásar á leigubílstjóra í apríl sl. og fleiri brota. Við yfirheyrslur lögreglu hefur hann játað árásina og mun að öllum líkindum verða ákærður fyrir tilraun til manndráps, en að öðrum kosti stórfellda líkamsárás.

Pilturinn, sem fæddur er árið 1991, hefur verið töluvert í umræðunni á undanförnum mánuðum, en fremur sjaldgæft er að svo ungt fólk þurfi að sæta gæsluvarðhaldi. Eftir árásina á leigubílstjórann var honum komið fyrir á meðferðarheimili ríkisins að Stuðlum eftir skamma dvöl í einangrun í hegningarhúsinu við Skólavörðustíg.

Samkvæmt heimildum Morgunblaðsins var hins vegar ekki annað fært en að færa hann að nýju á Skólavörðustíginn eftir skamma dvöl á Stuðlum.

Vopnað rán í 10–11

Pilturinn var dæmdur í tuttugu mánaða fangelsi í Héraðsdómi Reykjaness á fimmtudag en hann tók m.a. þátt í þremur ránum auk þjófnaða og nytjastulda. Hann sagðist sjálfur hafa verið í óhóflegri fíkniefnaneyslu allt frá 12 ára aldri og kvaðst aldrei hafa farið í meðferð. Einna alvarlegasta brotið sem hann var sakfelldur fyrir var vopnað rán sem hann framdi í 10–11 verslun ásamt tveimur félögum sínum.

Einnig var hann sakfelldur fyrir aðild sína að tilraun til ráns á hraðbanka og fyrir að hafa, ásamt tveimur félögum, veist að tveimur mönnum í miðbæ Reykjavíkur, hótað þeim öllu illu og tekið af þeim farsíma þar sem þeir höfðu ekki reiðufé á sér.

Steininn tók úr 27. apríl sl. þegar pilturinn réðst að leigubílstjóra vopnaður hamri og veitti honum þungt högg hægra megin á höfuðið. Bílstjórinn hlaut af innkýlt höfuðkúpubrot og innvortis blæðingu á höfði. Brotið getur varðað allt að 16 ára, eða ævilöngu, fangelsi. Áður en hann var handtekinn vegna árásarinnar stal hann kveikjuláslyklum úr búningsklefa Sundhallar Reykjavíkur en komst ekki langt því hann ók bifreiðinni á ljósastaur við Sæbraut. Hann var handtekinn skammt frá.

Í varðhaldi til 17. ágúst

Samkvæmt greinargerð lögreglu var pilturinn í afar slæmu ástandi vegna áhrifa lyfja eða fíkniefna. Við skýrslutöku sagðist pilturinn ekki muna eftir atvikinu en játaði að hafa beitt hamri gegn leigubílstjóranum.

Ekki hefur verið gefin út ákæra í málinu en pilturinn mun sitja í gæsluvarðhaldi til 17. ágúst nk.