SVÞ vilja að Hagstofa Íslands annist verðrannsóknir. mbl.is/Golli

„SVÞ árétta það sem komið hefur fram í fjölmiðlum undanfarna daga um verðþróun matvæla á Íslandi, að matvöruverð hafi haldið niðri verðbólgu á undanförnum árum. Þannig hækkaði matvara aðeins um 2,70% á tímabilinu febrúar árið 2002 til febrúar ársins 2007 á meðan vísitala neysluverðs hækkaði um 21,24%. Kaup á matvöru vega nú um 12,3% af útgjöldum heimila.

Vísitala neysluverðs hefur hækkað um 23,59% frá febrúar árið 2002 til júlí 2007. Á sama tíma hefur vísitala dagvöru lækkað um 3,55%. Frá febrúar árið 2002 til maí 2007 hefur húsnæðisvísitalan hækkað um 80,70% og launavísitalan um 40.97%.

Eftir lækkun virðisaukaskatts og vörugjalda á mat- og drykkjarvörur 1.mars sl. lýsti Hagstofa Íslands því yfir að verslunin hefði skilað sínu og vel það. Það er því algjörlega út í hött að halda því fram að verslunin hafi ekki staðið sig og skilað lækkunum til neytenda í landinu.

Um áhrif styrkingu krónunnar á vöruverð liggur ekkert fyrir annað en það sem úttekt Rannsóknarseturs verslunarinnar sýndi, að ætíð líður nokkur tími frá breytingum á gengi þar til áhrifin koma fram í vöruverði. Að auki má benda á að einungis um 30% innkaupa matvöruverslana eru innfluttar vörur sem eru að langstærstum hluta keyptar af innlendum birgjum í íslenskum krónum.

Hagstofa Íslands reiknar verðbreytingar í landinu og birtir reglulega vísitölu neysluverðs þar sem öll útgjöld fjölskyldunnar eru vegin. Versluninni þykir rétt að byggja á þessari vinnu og óumdeildri stöðu Hagstofunnar sem óhlutdrægs fagaðila og að Hagstofan auki þessar verðrannsóknir og annist þar með þá verðmælingu sem talin er henta þörfum neytenda í landinu. SVÞ hafa óskað eftir viðræðum við Hagstofuna í næsta mánuði um þessi mál. Jafnframt er talið eðlilegt að stjórnvöld endurskoði ráðstöfun opinberra fjármuna til verðrannsókna í þágu neytenda," að því er segir í yfirlýsingu frá SVÞ.