Svo virðist sem veðurblíðan sem lék um landið nú í sumar hafi ekki aðeins haft góð áhrif á landsmenn heldur einnig á berjasprettuna. Að mati Sveins Rúnars Haukssonar, læknis og áhugamanns um berjatínslu, virðist sem góða veðrið hafi valdið snemmbærri sprettu en óvissa ríkti um sprettuna, sér í lagi aðalbláberjasprettuna, þar sem maímánuður var óvanalega kaldur og þurrt hefur verið í sumar. Hann segir berin sem hann hefur smakkað vera súr og frísk og lofa mjög góðu.

Sveinn Rúnar segir mikla krækiberjasprettu vera komna í Elliðaárdalinn auk bláberjagrænjaxla sem sumir hverjir séu orðnir bláir. Það sé ljóst að séu berin orðin svona sýnileg í lok júlí sé ekki langt að bíða þess að nóg finnist af þeim, þó að vafalítið þurfi dálitla vætu svo að sprettan verði betri.

Hér áður fyrr var venjan sú að fólk fór í berjamó í lok ágúst og byrjun september en Sveinn Rúnar segir tímabil til tínslu hafa lengst og nú sé óhætt að fara að gá að berjum strax í byrjun ágúst.

Aðspurður segir Sveinn Rúnar of snemmt að segja til um hvert best sé að fara og hvar sprettan verði mest þar sem hann hafi ekki fengið neinar fréttir frá öðrum landshlutum en í raun séu góð berjalönd allt í kringum landið og hægt að finna helstu berjategundirnar hvar sem er, þó að aðalbláberin séu reyndar síst á Suður- og Vesturlandi.

Sjá nánar í Morgunblaðinu í dag.