Lögreglan á Akureyri handtók í gær þrjú ungmenni sem grunuð voru um að hafa tekið þátt í nokkrum innbrotum í bænum í síðustu viku og um sl. helgi. Lögreglan yfirheyrði ungmennin, tvo pilta og stúlku sem öll eru á 18. aldursári, í gærkvöldi og hafa þau játað brot sín. Að sögn lögreglu hefur mest allt þýfið verið endurheimt en andvirði þess nemur hundruðum þúsunda kr.

Við yfirheyrslur kom í ljós að annar piltanna hafði brotist inn á fjórum stöðum og gert tilraunir til þess að brjótast inn á þrjá aðra staði á síðustu dögum. Hann viðurkenndi að hafa brotist inn í verslanirnar Litaland og Radionaust á Akureyri, einbýlishús við Glerárhverfi og þá braust hann inn í aðstöðu skógræktarinnar í Kjarnaskógi.

Auk þess gerði pilturinn tilraun til þess að brjótast inn í verslunina Síðu í Glerárhverfi, Videobarinn og þá reyndi hann einnig að brjótast inn í söluturninn Hreiðrið.

Sem fyrr segir átti annar piltanna þátt í öllum sjö innbrotunum. Hinn pilturinn og stúlkan aðstoðuðu hann hinsvegar aðeins í einu innbrotanna.

Ungmennunum hefur verið sleppt og telst málið upplýst. Það fer nú sinn hefðbundna farveg í kerfinu en haft var samband við foreldra ungmennanna sem og Barnaverndarnefnd vegna málsins þar sem þau eru öll undir lögaldri, þau hafa öll komið lítillega við sögu lögreglu áður.

Mest allt þýfið hefur komist til skila að sögn lögreglu. Meðal þess sem þjófarnir tóku voru tvær fartölvur, myndavélar, leikjatölva og DVD-mynddiskar. Lögreglan telur að andvirði þýfisins nemi mörg hundruð þúsundum kr.