Á föstudagskvöldið rétt um klukkan 23:30 var tilkynnt til lögreglu á Ísafirði að bifreið hafi verið ekið á gám á athafnasvæði Eimskips á Ísafirði og ökumaðurinn væri stunginn af. Lögreglan leitaði ökumannsins og hafði upplýsingar um hvern var að ræða. Klukkan um 01:30 um nóttina gaf ökumaður sig fram og reyndist ölvaður. Viðurkenndi hann að hafa verið drukkinn er hann ók á gáminn. Ökuskírteini hans var þá rétt rúmlega mánaðar gamalt.

Klukkan 09:00 á laugardagsmorguninn var tilkynnt um bifreið utan vegar í Tálknafirði og líklegur ökumaður á hlaupum um tún við sveitabæ þar skammt frá. Lögreglumenn handtóku konu rúmlega fimmtuga, þar sem hún lá á túninu. Var hún grunuð um aksturinn.

Aðfaranótt laugardagsins klukkan rúmlega 04:00 reyndu tveir menn að komast í gleðskap sem í gangi var í Ísafjarðarbæ. Húsráðandi neitaði þeim inngöngu. Annar aðilinn tók sig þá til og sló húsráðanda í andlitið, en hinn réðist að eiginkonunni og hrinti henni.

Að svo búnu fóru mennirnir á braut. Þeim fannst ekki nóg að gert og mættu aftur á staðinn klukkutíma seinna og réðust aftur að húsráðanda, börðu og spörkuðu í hann áður en þeir hlupu af vettvangi. Aðfaranótt sunnudagsins var önnur líkamsáraás þar sem ungur maður réðist að sér yngri manni og sló hann í andlitið með flösku. Áverkarnir eru ekki miklir, en verknaðurinn alvarlegur.