Ísland mun yfirtaka starfsemi Ratsjárstofnunar frá og með 15. ágúst nk. Starfshópur skipaður sérfræðingum utanríkisráðuneytisins vinnur nú að undirbúningi snurðulausrar yfirtöku íslenskra stjórnvalda á starfsemi stofnunarinnar og aðlögun að íslenskri stjórnsýslu.

Fram kemur í tilkynningu frá utanríkisráðuneytinu að undanfarna mánuði hafi viðræður milli Íslands og Bandaríkjanna um framtíð ratsjár- og loftvarnakerfisins á Íslandi staðið yfir. Hingað til hafa Bandaríkin staðið straum af öllum rekstrarkostnaði Ratsjárstofnunar og rekstrarumgjörð hennar mótast af því. Í apríl sl. samþykkti þáverandi ríkisstjórn að heimilaðar yrðu fjárveitingar að upphæð 241 milljón kr. í fjáraukalögum 2007 og 824 milljónir kr. á fjárlögum 2008 vegna reksturs Ratsjárstofnunar.

Fram kemur að á þessum tímamótum sé mikilvægt að yfirtakan raski ekki núverandi starfsemi sem lúti bæði að öryggis- og varnarmálum og borgaralegri flugumferð. Við yfirtökuna verður leitað leiða til að auka hagræðingu í rekstri starfseminnar og draga úr kostnaði ríkissjóðs. Jafnframt verða gildandi kjarasamningar og ráðningarsamningar starfsfólksins virtir.

Starfshópur utanríkisráðuneytisins mun vinna verk sitt í náinni samvinnu við fyrirsvarsmenn Ratsjárstofnunarinnar. Aðlögun starfseminnar að íslenskri stjórnsýslu mun taka ákveðinn tíma og stefnt er að því að starfshópurinn leggi tillögur sínar fyrir utanríkisráðherra á haustmánuðum