Lögreglan á Akureyri lætur mjög vel af hátíðarhöldum þar í bæ í gærkvöldi og nótt en þar hófst hátíðin Ein með öllu í gærkvöldi. Rólegt var á tjaldsvæðum bæjarins upp úr miðnætti og svefnfriður. Sömu sögu er að segja frá Vestmannaeyjum þar sem þjóðhátíð hófst í gær. Að sögn lögreglu er aðeins einn í fangageymslu eftir nóttina en hann var fjarlægður úr Herjólfsdal vegna ölvunar.

Að sögn Daníels Guðjónssonar, yfirlögregluþjóns á Akureyri, komu engin sérstök mál upp í tengslum við skemmtanahald og allt yfirbragð í bænum var gott. Þá var rólegt á tjaldsvæðum bæjarins upp úr miðnætti og svefnfriður.

Daníel sagðist ekki geta áætlað hve margir hefðu verið í miðbænum í nótt en talsverður fjöldi hefði verið við setningu hátíðarinnar og síðan sótt skemmtistaði í bænum. Hugsanlega hefði veðrið þó latt fólk frá því að fara í bæinn en nokkuð rigndi í gærkvöldi.

Nokkur ölvun var í bænum en gestir fóru fljótlega heim eftir að dansleikjum lauk og engin vandamál sköpuðust í miðbænum. Umferðin var slysalaus en fjórtán voru teknir fyrir of hraðan akstur og einn fyrir ætlaðan ölvunarakstur.

Bæjaryfirvöld á Akureyri ákváðu í vikunni að banna ungmennum á aldrinum 18-23 ára að tjalda á tjaldsvæðum bæjarins. Daníel sagði, að þessi ákvörðun hefði ekki valdið neinum vandamálum í gær og fólk, sem hefði tjaldað á öðrum svæðum, hefði tekið tjöld sín upp án mótþróa ef um það var beðið. Þá sagðist Daníel ekki hafa heyrt af neinum vandamálum á öðrum stöðum í nágrenni Akureyrar.

Lögreglan í Vestmannaeyjum segir að þjóðhátíð hafi farið afar vel fram í nótt og engin sérstök mál hafi komið upp þrátt fyrir mikinn mannfjölda í Herjólfsdal en áætlað er að 9-10 þúsund manns hafi verið í dalnum. Veður batnaði mjög í gærkvöldi en þá lægði eftir talsvert hvassviðri í gær og engin rigning var í nótt. Í morgun hefur síðan birt enn frekar til.