Hafin verður sala á visthæfum etanólbílum á næstunni en salan er liður í tilraunaverkefni Brimborgar. Að sögn Egils Jóhannssonar, framkvæmdastjóra Brimborgar, er ein etanólbifreið komin til landsins og er von á annarri í næstu viku. Eldsneytið nefnist E85 og er blanda af bensíni og etanóli og vísar talan í hlutfall etanólsins í blöndunni. Það hefur ekki verið til hér á landi en Olís mun flytja inn tvö þúsund lítra og verður lítil stöð líklegast sett upp skammt frá húsnæði Brimborgar. Dreifing mun síðan hefjast innan skamms.

"Við höfum satt að segja ekki mikla trú á að þetta gangi ekki. Núna ganga 63 þúsund bílar í Svíþjóð fyrir E85 en byrjað var að selja bílana fyrir sex árum. Af árlegri sölu er sala etanólbíla komin upp í 16% og fer vaxandi," segir Egill. Ekki er vitað hvort E85 verði dýrara eða ódýrara en bensín en það er undir stjórnvöldum komið hvaða gjöld verða lögð á það. Egill segist vona að gjöldin verði felld niður þar sem etanól er endurnýjanlegt eldsneyti og að bílarnir falli í flokk með bifreiðum sem gangi fyrir nýjum orkugjöfum því þá verði ákveðnar niðurfellingar á vörugjöldum.

Sjá nánar í Morgunblaðinu í dag.