Varnaæfingin Norður Víkingur 07 hefst hér á landi í næstu viku. Þessi æfing hefur vakið nokkra athygli í Noregi enda taka norskar F-16 orrustuflugvélar og norskir sérsveitarmenn þátt í æfingunni. Espen Barth Eide, aðstoðarvarnarmálaráðherra Noregs, segir við Aftenposten í dag, að þessi æfing sé fyrsta birtingarmynd aukinnar varnarmálasamvinnu milli Íslands og Noregs.

Ísland skrifaði undir rammasamninga við Norðmenn og Dani fyrr á þessu ári um samstarf á sviði öryggis- og varnarmála.

Æfingin í næstu viku er sú fyrsta, sem fer fram á Íslandi á grundvelli samkomulags íslenskra og bandarískra stjórnvalda frá 11. október í fyrra um varnir landsins. Æfingin verður haldin 11.-13. ágúst og er markmið hennar, að æfa flutning liðsafla til landsins á hættu- og ófriðartímum, staðsetningu, varnarviðbúnað, ákvarðanatöku og samræmingu við íslensk stjórnvöld. Fyrirhugað er að æfingar af þessu tagi verði reglubundin hluti af varnarviðbúnaði landsins.

Æfingin skiptist í tvo aðskilda þætt; loftvarnaræfingu og hins vegar æfingu gegn hermdar- og hryðjuverkum. Í loftvarnaræfingunni taka þátt Bandaríkjamenn með þrjár F-15 orrustuflugvélar og tvær KC-135 eldsneytisflugvélar og Norðmenn með tvær F-16 orrustuflugvélar og eina P-3 eftirlits- og kafbátaleitarflugvél. Frá Atlantshafsbandalaginu munu tvær AWAC´s- ratsjárflugvélar taka þátt, en önnur þeirra mun fljúga frá Noregi án viðkomu hér á landi.

Varðskipið Triton frá Danmörku tekur einnig þátt í hluta loftvarnaræfingarinnar og stendur leitar - og björgunarvakt.

Stjórnstöð íslenska loftvarnarkerfisins mun gegna hlutverki sem yfirstjórnstöð æfingarinnar. Ennfremur mun Landhelgisgæslan leggja til tvær björgunarþyrlur á meðan æfingin varir. Áætlaður fjöldi þátttakenda í þessum hluta æfingarinnar er um 240 manns.

Í æfingunni gegn hermdar- og hryðjuverkum taka þátt 20 norskir, 6 danskir og 16 lettneskir sérsveitarmenn auk sérsveitar ríkislögreglustjóra með 15 manns eða alls 65 manns. Heildarfjöldi þátttakenda verður því alls um 300 manns, 13 flugvélar, þyrlur og eitt eftirlitsskip.