Greg Sarakatsannis, yfirmaður hjá bandaríska hernum, segir æfinguna vera litla í sniðum og hún endurspegli ekki herstyrkinn sem liggi að baki. Henni er ætlað að þjálfa herstyrk sem hugsanlega kemur Íslandi til bjargar í hættuástandi.

Friðþór Eydal, upplýsingafulltrúi Norðurvíkings, segir megintilganginn vera að þjálfa íslenska starfsmenn í því að taka á móti herliði og tryggja að allur búnaður hér á landi virki ef ógn steðjar að.

Lítil æfing fyrir stóra heri

Þrátt fyrir að æfingin sé ef til vill lítil í sniðum í alþjóðlegum samanburði voru ófá tonn af fólki og búnaði flutt til landsins.

Á loftvarnaræfingunni taka 240 menn þátt, 13 flugvélar, þyrlur og eitt skip. Bandaríkjamenn komu til landsins með 3 F-15 orrustuflugvélar og tvær KC-135 eldsneytisvélar. Norðmenn komu með tvær F-16 orrustuvélar og eina P-3 eftirlits- og kafbátaleitarflugvél. Atlantshafsbandalagið lagði til tvær AWAC ratsjárflugvélar til æfingarinnar, en önnur þeirra flýgur frá Noregi án viðkomu á Íslandi. Varðskipið Triton frá Danmörku tekur einnig þátt í og stendur leitar- og björgunarvakt. Auk þess eru þyrlur landhelgisgæslunnar í viðbragðsstöðu.

Á æfingu sérsveita taka 20 norskir, 7 danskir og 15 lettneskir og 15 íslenskir sérsveitamenn þátt, eða samtals 57 manns. Heildarfjöldi þátttakenda er því hátt á fjórða hundrað.

Slökkvilið fékk þjálfun til upprifjunar

Íslenska ríkið leggur til húsnæði, mat, samgöngur innanlands og öryggisgæslu. 270 manns búa nú í fyrrum húsnæði bandaríska hersins á Keflavíkurflugvelli. Áætlaður kostnaður íslenska ríkisins er 45 milljónir króna.

Auk þess að sinna helstu nauðsynjum fyrir hermennina þurfti að lagfæra ýmislegt á vellinum áður en tekið var á móti bandaríski herinn. Flytja þurfti inn eldsneyti fyrir þoturnar og laga búnað fyrir orrustuþotur á flugbrautinni. Þá fékk slökkvilið upprifjun á því hvernig bregðast skuli við ef kviknar í eldsneyti á flugvellinum og hvernig skuli bjarga flugmönnum ef þeir festast inni í þotunni.