Eftir Hjálmar Stefán Brynjólfsson

hsb@mbl.is

Tónninn á ráðstefnu um geðheilbrigðisþjónustu barna í dreifbýli sem haldin var á Akureyri í gær, var ólíkt jákvæðari en við var að búast. Í erindum fyrirlesaranna og í umræðum sem sköpuðust eftir þau mátti heyra að ráðstefnugestir voru ánægðir með þau tíðindi sem bárust frá Guðlaugi Þór Þórðarsyni heilbrigðisráðherra að þjónusta Barna- og unglingageðdeildar Landspítalans verði efld með 150 milljóna króna framlagi. Orðið "eyrnakonfekt," var notað í einu erindanna, til að lýsa þessum tíðindum.

Guðlaugur Þór setti ráðstefnuna í gær og sagði geðheilbrigðisþjónustuna fyrst og fremst byggjast á samvinnu: "Ólíkir aðilar verða að vinna saman til að árangur náist; skólayfirvöld, félagsmálayfirvöld og heilbrigðisyfirvöld á hverjum stað, til að auka upplýsingaflæði." Guðlaugur segir jafnframt að flest það sem komi fram í því átaki sem heilbrigðisráðuneytið er að ráðast í um þessar mundir, muni nýtast á landsbyggðinni. Til að mynda verði aðgengi barna og unglinga að sjálfstætt starfandi sérfræðingum aukið, forvarnir auknar, biðlistum á BUGL náð niður og ferðum starfsmanna hjá BUGL út á land fjölgað.

"Eldveggir rifnir niður"

Aðspurður út í þá gagnrýni sem hefur komið fram í fjölmiðlum varðandi þá upphæð sem nú verður notuð til að efla BUGL, sagði Guðlaugur að á bakvið hana lægi vönduð aðgerðaáætlun, og að upphæðin hefði ekki verið ákveðin út í bláinn heldur í samráði við starfsmenn stofnunarinnar.

Sjá nánar í Morgunblaðinu í dag.