Fulltrúar Vinstri grænna og F-lista hafa lagt fram tillögu um að borgarráð samþykki að fela borgarstjóra að leita leiða til þess að borgin festi kaup á húsunum við Laugaveg 4-6 í því skyni að varðveita þau í því sem næst upprunalegri mynd.
Í greinargerð með tillögunni segir, að mikil umræða hafi farið fram um húsvernd síðustu misseri og auk þess hafi verið samþykkt að hefja sérstaka vinnu við nýja húsverndaráætlun í tengslum við nýtt aðalskipulag. Borgin myndi fjármagna uppbyggingu húsanna í þágu sögu og samhengis á þessum mikilvæga stað í borginni og jafnvel hækka húsin eða lengja þau, þó þannig að sögunni sé sómi sýndur. Borgin myndi að því loknu selja húsin á frjálsum markaði aðilum sem gæði húsin lífi með einhvers konar miðborgarrekstri.