Laxveiðimenn líkja ástandinu í ánum þessa dagana við það sem menn eiga frekar að venjast við bestu skilyrði í júlímánuði. Eftir langvarandi þurrka sumarsins er loksins gott vatn í ánum, lax að dreifa sér og víða er hann að ganga af krafti. Holl sem var við veiðar í Norðurá um helgina landaði um 90 löxum og var lax að finna á öllum helstu göngustöðum árinnar. Hollið sem var í Langá á sama tíma veiddi 111 laxa, og samkvæmt upplýsingum fréttavefjar SVFR er mikið af laxi í ánni. Til að mynda gengu 130 laxar stigann í Sveðjufossi á einum sólarhring.

Blaðamaður kom við á Alviðru í Sogi um helgina og þá höfðu um 150 laxar verið færðir þar til bókar, sem er afar mikil breyting frá því í fyrra er 17 veiddust á svæðinu. Var greinilega mikið af laxi á sumum veiðistöðunum, eins og í Kúagili sem og við Klöppina og Tunnu. Höfðu Klöppin og Breiðan gefið tæplega 50 laxa hvor veiðistaður.

Lentum í ævintýri

"Við lentum í sannkölluðu ævintýri," sagði Björn Ólafsson, fyrrverandi skólastjóri, um veiðiferð þeirra félaganna í Haukadalsá í síðustu viku. Þegar þeir mættu höfðu veiðst um 200 laxar í ánni, en það var nóg af fiski, hann lá bara styggur á nokkrum stöðum. "Fyrstu vaktina veiddum við þrjá laxa, en þá var líka farið að rigna og laxinn fór að hreyfa sig. Næstu fimm vaktir fengum við síðan 90 laxa, á stangirnar fimm!

Ein stöngin fékk 27 laxa, ein 17 – svona var þetta. Ég fékk 19 á flugu, rauður Frances númer 14 var gegnumgangandi."

Björn sagði veiðimenn hafa farið út um níu á morgnana og verið komna í hús um klukkan átta; í ánni var bullandi taka.

"Við fengum þessa fiska um alla á, líka lúsuga fiska. Þarna hittum við á sannkallaða óskastund. Það var nóg af fiski í ánni, svo fór að rigna, það var hlýtt í veðri, og allt fór af stað."

Víðar í Dölunum veiðist vel. Þarsíðasta holl í Flekkudalsá fékk til að mynda 10 laxa og þar veiddust lúsugir laxar í gær, sem er afar óvenjulegt svo seint í ágústmánuði.

Eystri-Rangá yfir 4.000

Eins og rækilega hefur komið fram er mokveiði þessa dagana í Rangánum. Í Eystri-Rangá veiddist lax númer 4.000 í gærmorgun og í hléinu var veiðin komin í 4.065. Um fimmtíu til veiddust á seinni vaktinni. Eftir að tók að rigna í þarsíðustu viku hefur áin verið illveiðandi í nokkra daga, vegna skols, en samt hefur göngufiskur verið að taka í grugginu, að sögn Einars Lúðvíkssonar og þá daga hafa nokkrir tugir laxa veiðst. Um leið og áin hreinsar sig hefur veiðin aftur orðið á bilinu 120 til 150 laxar á dag.

Húnvetnsku árnar hafa einnig tekið kipp í vætutíðinni en að sögn Stefáns Sigurðssonar hjá Lax-á hafa verið að veiðast um 20 laxar á dag í Víðidalsá og allt að 40 á dag í Miðfjarðará.