Forstjórar Orkuveitu Reykjavíkur og Landsnets hf. skrifuðu í dag undir samning um kaup Landsnets á flutningsvirkjum í eigu Orkuveitu Reykjavíkur. Kaupverðið er 1,3 milljarðar króna og greiðir Landsnet fyrir raforkuvirkin í hlutafé og reiðufé. Meðal mannvirkjanna sem OR selur eru rafstengur frá Nesjavallavirkjun að tengivirkinu við Korpu, Akraneslína auk ýmiss búnaðar í tengivirkjum.

Í tilkynningu frá Orkuveitunni sgeir Guðmundur Þóroddsson, forstjóri OR, að salan komi til með að skerpa skil dreifingar og flutnings á raforku, sem sé til þess fallið að auka gegnsæi á þessum mikilvæga markaði. Þórður Guðmundsson, forstjóri Landsnets, segir þetta einfalda rekstur flutningskerfis raforku og að betri yfirsýn fáist yfir kerfið.

Við kaupin hefur Landsnet eignast allt meginflutningskerfi landsins, en fyrir skemmstu keypti Landsnet flutningsvirki Hitaveitu Suðurnesja hf. Við markaðsvæðingu raforkumála, árið 2005, var flutningskerfi raforku skilgreint og það falið Landsneti til rekstrar. Hlutar þessa kerfis voru í eigu ýmissa orkufyrirtækja. Stóð þeim þá til boða að selja Landsneti flutningsvirki sín og fá greitt í reiðufé eða hlutafé. Einnig stóð til boða að leigja Landsneti mannvirkin og var það sá kostur sem Orkuveita Reykjavíkur tók á þeim tíma.

Af kaupverðinu greiðir Landsnet um 900 milljónir í reiðufé og um 400 milljónir í hlutafé, sem svarar til u.þ.b. 8% hlutar í Landsneti. Samningurinn var undirritaður með fyrirvara um samþykki hluthafafundar Landsnets.