Borgarstjórn Reykjavíkur felldi í dag með 8 atkvæðum gegn 4 tillögu F-lista og VG um að leitað verði leiða til þess að borgin festi kaup á húsunum við Laugaveg 4-6 í því skyni að varðveita þau í því sem næst upprunalegri mynd. Þrír borgarfulltrúar sátu hjá. Borgarráð hefur áður samþykkt heimild til niðurrifs húsanna og nýbyggingar á lóðunum.

Umræður um tillöguna stóðu yfir í rúmar tvær stundir í upphafi borgarstjórnarfundar, sem væntanlega mun standa yfir fram á kvöld. Svandís Svavarsdóttir, borgarfulltrúi VG, sagði m.a. að menn yrðu að hafa þor til að skipta um skoðun ef rök stæðu til þess.

Hanna Birna Kristjánsdóttir, borgarfulltrúi sjálfstæðismanna, sagði að sátt hefði verið um deiliskipulag, sem samþykkt var fyrir þetta svæði árið 2002 en þar var gert ráð fyrir að húsin yrðu rifin og ný hús byggð. Þá hefði verið lögð áhersla á að Laugavegurinn væri verslunargata þar sem mætti byggja upp en jafnframt yrði borin virðing fyrir sögunni. Enginn hefði hins vegar lagt til á sínum tíma, að þessi tilteknu hús yrðu vernduð.

Nú er hafin umræða á fundi borgarstjórnar um þá tillögu stjórnar Orkuveitu Reykjavíkur, að rekstrarforminu verði breytt úr sameignarfélagi í hlutafélag.

Hægt er að fylgjast með umræðum á borgarstjórnarfundinum á vef Reykjavíkurborgar