Mannekla á leikskólum Reykjavíkurborgar og þau vandræði sem hún hefur í för með sér í þjóðfélaginu verða rædd á fundi borgarstjórnar í dag, fundi leikskólaráðs á morgun og í borgarráði á fimmtudag. Starfsfólk vantar nú í 159 stöðugildi á leikskólum Reykjavíkurborgar, samkvæmt upplýsingum Ragnhildar Erlu Bjarnadóttur, sviðsstjóra leikskólasviðs borgarinnar.

Ragnhildur segir ástandið mjög erfitt en að starfsfólk sé þó aðeins að tínast inn. Þannig hafi vantað starfsfólk í 174 stöðugildi fyrir helgi og hún voni að lausum stöðugildum haldi áfram að fækka dag frá degi.

Fyrir helgi biðu 359 börn, sem fengið hafa pláss á leikskóla, þess að geta hafið leikskólavist þar sem ekki hafði verið hægt að taka þau inn vegna manneklu á leikskólunum.

Ragnheiður segir leikskólasvið nú leita allra leiða til að manna lausar stöður, m.a. hafi verið auglýst eftir starfsfólki bæði í hverfum og á landsvísu og boðið upp á starfstengt íslenskunám á leikskólum fyrir útlendinga. Þá hafi menntamálaráðherra verið gerð grein fyrir stöðunni.

Ragnhildur segir hins vegar ljóst að vandinn einskorðist ekki við leikskóla heldur vanti greinilega víða starfsfólk í þjóðfélaginu. Þetta sjáist m.a. á því að verslanir séu nú farnar að biðjast afsökunar á því í auglýsingum að þær geti ekki boðið upp á þá þjónustu sem æskilegt væri vegna skorts á starfsfólki.