Tveir gistu fangageymslur lögreglunnar á Suðurnesjum í Reykjanesbæ í nótt en annar þeirra er grunaður um líkamsárás og er það mál í rannsókn. Hinn var látinn dúsa í klefa í nótt vegna ölvunar og óláta á skemmtistað. Einn ökumaður var stöðvaður á Grindavíkurvegi í nótt grunaður um ölvun við akstur.

Síðdegis í gær var tilkynnt um bílveltu á Vatnsleysustrandarvegi rétt við nýju gatnamótin við Reykjanesbrautina. Þar hafði bifreið hafnaði á toppnum. Ökumaðurinn var fluttur á Heilbrigðisstofnun Suðurnesja til skoðunar og er hann jafnframt grunaður um ölvun við akstur.

Um kl. 14:30 í gær var tilkynnt um vélhjólaslys á línuvegi Hitaveitu Suðurnesja að Svartsengi. Þar hafði ökumaður vélhjóls misst stjórn á hjóli sínu og fallið á veginn. Hann var fluttur á Heilbrigðisstofnun Suðurnesja til skoðunar. Hann reyndist viðbeinsbrotinn og með blæðingu í fæti. Ökumaðurinn reyndist ekki hafa réttindi til aksturs á hjólinu.

Kl. 17:42 var tilkynnt um umferðarslys á Reykjanesbraut við Grænásgatnamótin. Þarna höfðu fólksbíll og jeppabifreið lent í hörðum árekstri. Ökumaður í fólksbifreiðinni ásamt tveimur börnum, sem voru í bílnum voru flutt á Heilbrigðisstofnun Suðurnesja til skoðunar og þaðan á Landsspítalann í Fossvogi. Erfiðlega gekk að ná ökumanninum úr bifreiðinni og var Reykjanesbrautinni lokað um tíma vegna þess, samkvæmt upplýsingum frá lögreglu.