Ingibjörg Sólrún Gísladóttir utanríkisráðherra og Þórunn Sveinbjarnardóttir umhverfisráðherra tóku í gær þátt í ráðstefnu Ban Ki-moon, framkvæmdastjóra Sameinuðu þjóðanna, um loftslagsbreytingar í höfuðstöðvum SÞ í New York ásamt 150 ráðherrum og leiðtogum aðildarríkja SÞ. Ingibjörg Sólrún tók til máls í einni af málstofum ráðstefnunnar og sagðist, í samtali við Morgunblaðið í gærkvöldi, hafa rætt mikilvægi þess að ríki heims stefndu eindregið að því að ná niðurstöðu í loftslagsmálum og að þau gerðu með sér skuldbindandi samkomulag í þeim efnum.

"Ég lagði líka áherslu á að þó að það sé mikilvægt að iðnríki heims, stóru þjóðirnar, sýni ákveðið frumkvæði þá megi ekki taka þessi mál út af vettvangi Sameinuðu þjóðanna," segir Ingibjörg Sólrún. "Niðurstaðan í loftslagsmálunum verður að vera á vettvangi Sameinuðu þjóðanna, hún verður að vera skuldbindandi fyrir allar þjóðir. Það er líka mikilvægt að smáríki eigi aðild að þessu og að til verði niðurstaða sem bæði iðnríkin geta lifað við sem og þróunarríki."

Ingibjörg Sólrún segir að á ráðstefnunni hafi mátt finna skýra afstöðu þess efnis að loftslagsmál séu "mál málanna" í dag á alþjóðavettvangi. Og það er lögð "áhersla á að ná samkomulagi sem verði skuldbindandi fyrir þjóðir heims," segir hún. Þar eru bundnar vonir við Loftslagsráðstefnu SÞ sem haldin verður á Balí í desember en þar verður lagður grunnurinn að annarri slíkri ráðstefnu sem haldin verður í Kaupmannahöfn á næsta ári. Þar er vonast til að þýðingarmiklir samningar náist.

Sjá nánar í Morgunblaðinu.