Eftir Einar Fal Ingólfsson

efi@mbl.is

Laxveiðinni er lokið eða um það bil að ljúka víðast hvar. Í Rangánum er þó veitt fram í október og ekkert lát er á veiðinni þar, í fyrrakvöld fór eystri áin yfir 6.000 laxa.

"Síðasta vika var mjög góð, laxinn var fljótur að jafna sig eftir öll flóðin í vikunni þar á undan; flestir dagarnir gáfu yfir 100 laxa. Ég held að þessi vika verði allt eins góð, gæti endað í 600 löxum," segir Einar Lúðvíksson, umsjónarmaður Eystri-Rangár. Morgnarnir hafa verið rólegir, enda kalt í bítið, en laxinn hefur farið að taka upp úr klukkan tíu "og þá gerist þetta hratt."

Veitt er í Eystri-Rangá til 10. október og nokkra daga til á ákveðnum svæðum árinnar. Einar er farinn að hugsa fram í tímann og leyfir sér ekki að dvelja mikið við að fagna góðum árangri sumarsins. "Nú er ég farinn að hafa áhyggjur af því hvernig gangi að viðhalda þessari góðu veiði. Í fyrra var veiðin í meðallagi en þá vildu menn veiða jafn mikið og sumarið 2005, eða yfir 4.000 laxa. Nú getum við farið í 7.000 og þá hljóta menn að gera kröfu um álíka veiði áfram!"

Nærri 800 í Kjósinni

Ennþá er að veiðast lax á neðsta svæði Laxár í Kjós, en veiði lýkur þar í dag. Síðustu fimm dagana hefur verið svokallaður sjóbirtingstími í ánni. Lokatalan verður nærri 800 löxum. Mikið af fiski er dreift um alla á en veiðin hrökk seint í gang sökum hinna langvarandi þurrka í sumar. Að sögn Gísla Ásgeirssonar íhuga leigutakar Laxár að ræða við veiðifélagið um að opnun árinnar verði færð aftur til 20. júní, og að þá verði jafnframt veitt til 20. september og eftir 1. september undir merkjum veiða og sleppa.

Síðasti veiðidagurinn í Selá í Vopnafirði var í gær og lokatalan nærri 2.250 löxum. Er það nokkuð lakari útkoma en í fyrra, er veiddust 2.715, en engu að síður langt yfir meðaltalsveiði síðasta áratugar. "Veiðin varð daufari síðustu dagana, sökum kulda," sagði Gísli. Um 315 laxar veiddust í Svalbarðsá og Grímsá endaði í rétt tæplega 1.100. Þá veiddust 220 laxar í Korpu.

Meinað að kaupa leyfi

Í Leirvogsá veiddust 379 laxar á stangirnar tvær. Hefur oft veiðst betur en þetta er þó betri veiði en í fyrra, er 299 laxar veiddust. Eru þetta um 2,2 laxar á stöng á dag.

Stjórn Stangaveiðifélags Reykjavíkur hefur fjallað um mál veiðimannanna átta sem var vísað úr Hítará 12. september sl., fyrir að veiða á maðk á þeim tíma er fluga var eina leyfilega agnið. Niðurstaða stjórnarinnar er að allir séu veiðimennirnir brotlegir, þeir fjórir sem voru í ánni við veiðar og eins félagar þeirra á bakkanum, sem vissu af athæfinu og eru því meðsekir. Verður veiðimönnunum óheimilt að kaupa veiðileyfi af félaginu næstu þrjú árin.