Íslenskur ríkisborgari var handtekinn á flugvellinum í Delhi á Indlandi þar sem hann var eftirlýstur af bandarískum yfirvöldum fyrir peningaþvætti. Hans hefur verið leitað undanfarin fjögur ár eftir að hann forðaðist handtöku og yfirgaf Bandaríkin. Indverskir fjölmiðlar segja að dómstólar í Norður Karólínu hafi gefið út handtökuskipan á hann í september 2005.

Vefritið Express India.com skýrir frá því að Íslendingurinn hafi stundað peningaþvætti fyrir Bandaríkjamanninn William Pikard sem framleiddi og seldi LSD og hlaut dóm fyrir það 2003.

Samkvæmt bandarískum yfirvöldum mun íslendingurinn hafa hjálpað Pikard að fjárfesta í Rússlandi og er talið að sú fjárhæð hlaupi á 3 milljónum Bandaríkjadala.

Peningaþvættið mun hafa farið fram þannig að Pikard hafi orðið sér út um rannsóknarstöðu við University of California í Los Angeles og hlaut það sem talið var rannsóknarstyrk frá Rússlandi sem kom í raun frá Íslendingnum sem hafði fjárfest illa fengnu fé Pikards í Rússlandi og Eistlandi. Munu þeir hafa stundað þetta á árunum 1998 til 2005. Peningaþvætti er litið alvarlegum augum í Bandaríkjunum og er hámarks refsing 20 ára fangelsisdómur.

Ekki er ljóst hvort Íslendingurinn verður framseldur til Bandaríkjanna, hann mun koma fyrir dómara í Indlandi á morgun.