Svandís Svavarsdóttir, fulltrúi Vinstri grænna í stjórn Orkuveitu Reykjavíkur, lét bóka á stjórnarfundi fyrirtækisins í dag, að boðun eigendafundar vegna fyrirhugaðs samruna Reykjavík Energy Invest, dótturfélags OR, og Geysir Green Energi, stæðist ekki með tilvísun í sameignarsamning Orkuveitunnar.

Svandís segir í bókun sinni, að samkvæmt ákvæðum sameignarsamningsins skuli halda eigendafundi eftir ákvörðun stjórnar eða kröfu sameigenda, sem ráði yfir að minnsta kosti 5% eignarhluta. Slíkar kröfur skuli gerðar skriflega til stjórnar og til eigendafundar boðað með 7 daga fyrirvara á grundvelli kröfunnar.

Segir Svandís, að þar sem fundarboðið standist ekki geti fundurinn ekki skoðast lögmætur og þar með ekki heldur þær ákvarðanir, sem kunni að vera teknar á honum. Segist Svandís áskilja sér rétt til að láta reyna á lögmæti fundarins.

Undirbúningsfundur til að ræða samruna Reykjavík Energy Invest og Geysir Green Energy var boðaður klukkan 9 í morgun fyrir fulltrúa minnihluta í stjórn Orkuveitunnar. Svandís segir í annarri bókun, að á stjórnarfundi OR klukkan 15:15 í dag hafi stjórninni verið ætlað að taka ákvarðanir um gríðarlega hagsmuni og þar með umtalsverða ráðstöfun á almannafé. Þar sem ekki hafi gefist nægilegt ráðrúm til að taka efnislega afstöðu til samrunans á þessum þremur klukkutímum tali fulltrúi Vinstri grænna ekki efnislega afstöðu til málsins. Samruninn kunni að vera skynsamlegur en þar sem um eign stjórnvalds sé að ræða hljóti að þurfa að gera ærnari kröfur um undirbúning máls og upplýsta umræðu en gefst á þremur tímum.

Loks lét Svandís bóka, að kaup starfsmanna Reykjavík Energy Invest í fyrirtækinu kunni að orka tvímælis í ljósi starfsskyldna þeirra og stöðu gagnvart eigendum. Af þeim sökum þarfnist slík kaup sérstakrar skoðunar og þurfi að þola dagsljósið og umræðu úti í samfélaginu á öllum stigum málsins.